› 選擇地區
三藩市
紐約
洛杉磯
其他美國地區
香港 台灣 北美
 
2012年06月26日

金手指:一注獨沽港交所 - 孫柏文

上周,孫柏文日日追住青姐嘅專欄《青心直說》,因為一連四日追打港交所(388)買倫敦金屬交易所(LME)。咁除咗出價較貴等青姐指出嘅問題外,仲有一個作為白銀戰隊隊長見到嘅計時炸彈,令我叫大家一注獨沽港交所。
如果睇家嘅LME,買賣後遲交貨係算最大問題。因為有好多客戶問:「喂!買完貨,找埋數,點解遲遲都收唔到貨?」咁之前《金融時報》訪問港交所行政總裁李小加時,佢話倉庫延誤交貨係個別嘅行為問題,唔係淨係「物流問題」,仲話會檢視規則,整頓金屬倉庫嘅運作。

吞LME係計時炸彈

講真,我以前一路都有向李小加提供建議,今次亦唔例外。我諗港交所喺張臨時買賣合約上,應該要為倉裏嘅金屬驗驗貨,質、量都要做audit。如有出入,即刻行開唔買。
LME啲「個別」交易商遲交貨,唔係乜複雜屈機舉動,而係簡簡單單因佢哋冇貨。
問題係呢啲拋空咗貨嘅單位,一旦學雷曼咁,港交所變相成為嗰啲賣咗迷債嘅香港銀行,根本只係中間人唔關你事,都會被啲好似曾蔭權級數嘅政客,迫你還錢、還錢、還錢。Balancesheet嘅liabilities忽然成咗無底深潭,到時港交所嘅香港股東們點算?港府會唔會燒儲備Bailout?更會唔會Toobigtobail?
淨講白銀,家全球拋空咗嘅量係每年產量嘅倍數,拋得最多嗰兩間係JPMorgan同滙豐。李小加不如走去問吓呢兩間行,問吓佢哋有冇白銀啦。以前,冇人敢挑呢兩間行嘅機,倫敦鯨後嘅家?對冲基金已聞到佢哋嘅血,甚至為掩護打佢哋兩個,實際係想入法庭攞港交所嘅錢。最後,我唔識量化以上嘅風險,只知同當年滙控(005)食Household一樣,係計時炸彈,所以喺現價108.60元,一注獨沽港交所!

孫柏文
獨立股評人

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載