› 選擇地區
三藩市
紐約
洛杉磯
其他美國地區
香港 台灣 北美
 
2012年06月26日

好不主席:紅上添紅 - 盧先亞

政府重組架構「打尖」不成功,林瑞麟作了全港完美的「O嘴」示範。

在7.1儀式上,五司十四局的司局長希望齊齊騷吓個「梁營」,應該係「香港營」,然後在胡總的見證下宣誓上任。所以政府不惜打尖,嚟招「霸王硬上弓」,希望立法會可以通過所謂的重組方案。正當林公公以為坐定粒六、輕輕鬆鬆等收工之際,先有建制議員詐諦閃咗,再有葉劉埋沒「梁心」,投下神聖的棄權票,所謂改組方案,以一票之微,不獲通過。

紙上談兵難對症下藥

所謂機關算盡,冇得計,就是如此,而公公亦作了全港完美的「O嘴」示範。
CY一直對重組方案都是輕描淡寫,認為不過是微調改組,所以毋須在社會上進行諮詢與引發討論。雖然我都係執掌一間小小的公司,員工不過幾千,亦都明白無論行政架構做出任何改動,如加設任何新部門,甚或空降新部門主管等,此番動作背後都會牽涉一大串資源調配及人員安排,一旦處理得唔好,就會即刻引起唔同部門之間的利益爭奪及糾紛。如果我請一個新的部門主管,佢仲未返過工,就認定其轄下部門千瘡百孔,堅持先要徹底改組原本架構先得,話之佢幾叻都好,我都會請佢過主,除非佢買起我間公司,咁就任佢話事,不過CY可能真係覺得成個政府都可以搓圓㩒扁。
未真正檢視公司內部運作情況,就喺度呀吱呀咗,紙上談兵,好難有對症下藥之期。再者,我既為一間上市公司的主席,每使多一分一毫,都要諗過度過,要諗吓如何同股東交代。作為向全港700萬市民問責的候任特首,未向持份者諮詢(或者只向西問卜),未待社會完成醞釀,就要大改政府架構(更有違反基本法之嫌),每年使多7000幾萬,不過一闊三大,仲有着數肯定未見光。喺我啱啱交完報稅表嘅呢個敏感時刻,就更加觸景生「氣」。

增設副局長安撫心腹

其實未上任就蓋棺論定,認為舊人力有不逮,或者未夠赤心,當然實情亦都係有好多明哲保身、「雲在青天」。總之就係喺度話只有改變現有架構,才能有一番作為。
此番言論只會令現有公務員心灰意冷。而還未坐正就要在常秘之上增加副司長一職,當然又係要安撫自己心腹,但擺明嘅卻係唔信任現有問責班底。坊間傳言的五司十四局的名單,新入主者的背景都帶紅,除咗毫無政府管治經驗之餘,能力亦備受質疑。「梁營」7.1上任,睇怕唔係帶領香港人出紅海,而係更加深入紅海。難以想像未來特區不會出現內耗,血流的廝殺場面更是紅上添紅。

盧先亞

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載