蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年06月29日
馬上成為壹會員

智取大市:SOHO回購等於睇淡 - 晉佳

一間公司事先張揚嘅大額回購行動,仲要等你有機會早買過佢,唔通股價能夠節節上升,然後俾你可以喺高位沽貨輕易食糊?呢個世界邊有咁筍嘅事發生,如果係咁樣俾大戶高位沽貨,唔通開善堂俾錢你使咩。晉佳相信,SOHO中國(410)事先張揚嘅回購行動,有機會反映公司睇淡中短期股價表現,仲要唔回購撐價會跌得好慘嗰隻。
近排二、三線股跌到趴喺度,剩番內房股未出狀況,不過,去到7月份,有唔少內房股面對信託融資到期高峯,可能會出事,有機會追番其他二、三線股嘅跌幅。SOHO聞到味,喺未爆鑊之前,先公佈消息出嚟撐價,都合情合理。
另外,SOHO公佈回購後,大家可以當佢係港股溫度計,因為SOHO股價應該相對大市硬淨些少,如果稍後仲要跌低過消息公佈前嘅5.67元,相信成個市好難有運行,大家不妨當佢係測市指標。
講番SOHO,一家有錢剩嘅內房企業,又睇好後市,正常係會選擇買地擴充,而唔係買自己股票,尤其喺家其他內房企業咁等錢使嘅時間,睇好後市就梗係留子彈發展,嚟增加土儲,他朝推出項目就冇人同你爭飯食。SOHO主席潘石屹偏偏背道而馳,覺得地皮應該唔平唔買,樓唔貴唔賣,唔着重貨如輪轉嘅經營方式,竟然選擇回購股份。

最重要係貨如輪轉

喺3月業績發佈會,潘石屹都講過,認為住宅樓價太高。如果將經營風格比喻啲本地地產股,SOHO就似足恒隆地產(101),但求做啱事,最緊要唔好做錯。至於進攻型嘅恒大地產(3333),就比較似當年嘅信置(083),夠狠夠博,唔理市況。地產行業本身講求貨如輪轉,密食當三番,賣多幾個項目,總好過幾年先食一舖大牌,之所以恒隆唔能夠成為香港最強,就係因為唔夠博,剩係揀一啲「對」嘅項目去做,繼而一再錯失買地推盤機會。
閣下睇好內房嘅時候,會買一隻進攻型定係防守型嘅內房股?如果你係一個防守性投資者,會大注買一隻防守性嘅內房股,定係小注買一隻進攻型嘅內房股?答案好簡單,你係進攻定係防守型,你都未必考慮SOHO中國。所以,除非你拎支槍指住晉佳,否則小弟一定唔會買SOHO中國。

晉佳
本欄逢周一、三及五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載