› 選擇地區
三藩市
紐約
洛杉磯
其他美國地區
香港 台灣 北美
 
2012年06月29日

中環在線:彤叔女婿密封僭建 - 李華華

杜惠愷

一提CY又要講吓僭建問題。華華醒起舊年本報曾經踢爆,新世界發展(017)創辦人鄭裕彤女婿杜惠愷喺山頂道60號間獨立屋懷疑有萬尺僭建,呢個星期一專登走去望吓,發現懷疑僭建部份嘅玻璃大窗位已經俾石牆封住,但唔知會唔會內有乾坤?

屋宇署採拖字訣

華華即日畀電郵屋宇署同杜生查詢,等咗四日,屋宇署都覆唔到,可能成個屋宇署啲人都忙住處理未來老闆間山頂大宅嘅僭建問題,無人得閒理杜生間屋同埋華華嘅查詢啦,不過華華都只係想知道屋宇署有冇做嘢啫,費事一陣間唔問,俾人話華華冇問過或者問得唔好。
反而杜生好鬼緊張,周一晚已經回覆,話屋宇署有跟進,佢舊年底已經拆走晒啲僭建物,由於佢正外遊,唔方便畀華華入內參觀云云。咁又係,杜生又唔係CY,唔使開晒門畀華華入去還佢清白嘅!
杜生間屋仲有一個特色要講,就係大閘口掛咗個領事館牌。杜生係摩洛哥王國駐港「名譽領事」,呢個身份同呢個牌會唔會成為杜生嘅護身符,令佢唔使清拆僭建呢?(雖然杜生話拆晒)答案係唔會嘅。政府禮賓處話,一般事務上,領事館都要遵守本地法律,特別係「名譽領事」,佢哋本身通常都係香港市民,梗係要遵守香港法例啦。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載