› 選擇地區
三藩市
紐約
洛杉磯
其他美國地區
香港 台灣 北美
 
2012年07月11日

智取大市:非H股腳軟跌市動力增 - 晉佳

近期恒指靠一眾非H股頂住,中國移動(941)仲係強,但9RSI升近70,再升空間有限;滙豐控股(005)去到接近70蚊就腳軟,出現兩連陰,本地地產股亦都轉弱。晉佳唔信跌市就咁完結,反而覺得大市下跌動力增加咗,嚟緊幾日最緊要嘅指標,就睇港股會唔會持續陰燭。
睇番恒指圖表,新一輪跌浪似乎醞釀中,6月18日同7月5日出現咗兩個高度相若嘅短線浪頂(但唔算小雙頂)。回顧過去一年,恒指曾出現4個較急跌浪,其中3次,之前都係形成咗兩個浪頂,跟住就大跌。
睇嚟今次有啲似短線大跌市之前嘅模式,參考過往趨勢,閒閒哋由高位跌2500點,即係呢浸至少跌至17300。
睇番30分鐘圖,恒指6月下旬出現第一次擴散三角形,跌穿支持線19300但未死得,因為環球央行放水加上阿爺送禮,令短線起死回生,恒指仲升越6月高位;點知7月3日至9日又做出另一次擴散三角形,噚日再跌穿支持線,再度轉淡。環球央行出晒力救市,恒指短線依然連續兩次出現呢個極利淡訊號,睇嚟港股難逃一跌。

淡倉坐定 市彈短炒

另外,美國商品期貨委員會(CFTC)嘅美滙指數投機性長倉高達5萬張,雖然已經由高位6萬幾張回落,但仍處相當高水平。過往美滙指數投機性長倉由高位開始減少,通常係美滙指數向上突破嘅時候,同家情況差唔多。對上兩次出現類似情況,就要數番金融海嘯同埋2011年初,兩次美滙指數都有力上衝到去90水平,前者對港股嘅殺傷力唔使多講,後者亦令港股偏弱,睇嚟,呢個指標同樣反映港股未來兩三個月唔會有運行。
各項指標都咁弱,睇嚟淡倉最好坐定,最多喺突如其來嘅利好消息刺激股市反彈嘅時候,先至短線買入低殘股份博反彈,作為對冲。反之,如果見個市繼續弱勢,同時有個別股份升勢強勁,就唔好以為自己有能力炒股唔炒市,同大戶博鬥,因為家市場上根本冇魚腩,你落場好易會變魚腩,纏鬥之下容易損失未來入市嘅資本。講到尾,都係最老套嗰句,繼續保留實力。

晉佳
本欄逢周一、三及五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載