› 選擇地區
三藩市
紐約
洛杉磯
其他美國地區
香港 台灣 北美
 
2012年07月11日

中環在線:城大頒榮譽院士
富二三代攞晒彩 - 李華華

大專學府每年除咗爭排名,仲會鬥邊間撲水撲得多,水喉大啲可以命名大樓,冇咁揼本攞個榮譽院士都唔輸蝕。城大噚日就公布榮譽院士的「得獎者」,表揚他們對城大發展的貢獻,華華諗到四個字:商界抬頭。事關個個都係富二、富三代,包括工業家蔣震個女蔣麗芸、董建華外公顧宗瑞個孫(即係老董表弟)顧建綱、電梯大王胡法光之子胡曉明,仲有喺特首競選期間嘅唐營首號佈景板、華人置業(127)副主席劉鳴煒。

煒仔曾代父 捐億元予城大

上年獲頒榮譽院士嘅名單,有兩名運動員,前年都有傳統名校校長同非牟利機構總幹事,今年個個都係商界強人。最巴閉係大劉個大仔、今年先得33歲嘅劉鳴煒,舊年代父捐咗1.25億畀城大,成為城大歷來最大筆個人捐款,又設助學金扶持經濟有困難嘅學生,年輕有為又有愛心,相信城大校董會兩位前主席梁振英同孫德基都好想頒個獎畀佢。唔單止咁,劉鳴煒、蔣麗芸同胡曉明早前已委任為太平紳士,今次明顯係錦上添花!
查實好多富二三代都有攞過榮譽院士,好似四叔個大仔李家傑(Peter)咁,就係港大名譽大學院士,Peter曾經以私人名義捐錢畀港大社會科學院防止自殺研究中心,佢仲將港大個朵放埋喺恒地(012)年報內,睇嚟佢都幾受落!

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載