› 選擇地區
三藩市
紐約
洛杉磯
其他美國地區
香港 台灣 北美
 
2012年07月11日

好不主席:「上頭」「上心」 - 盧先亞

是次北上公幹其中一項重點工作,就是親身付運,將一瓶以年份計應該老過我嘅茅台酒,登門送贈某單位機構領導,藉以表達良好合作意願,亦望其高抬貴手,可以為我喺當地嘅經營予以方便。而呢啲禮節,在內地營商只屬最低門檻嘅要求,不過同事素知我品性,若有更高級別的安排亦盡量唔會驚動我,免得因為我不通國情而壞了大事。都好,嗰樽茅台亦係我喺盛情難卻嘅情況下收落,家陣樂得借花敬佛。而呢份心情,我哋前特首應有體會,因為佢一定係「勉為其難」先會收收埋埋咁多陳年茅台珍而藏之,仲話乜卸任之後仍有宴客需求,咁唔知佢在職嗰陣又真係開過幾多樽呢?
查實茅台為世人所識,都拜成40年前以此宴請外國友人嘅周恩來總理之功。一經品評,聲價十倍,更被譽為「國酒」。而隨着國家富起來,驕奢炫富之風益盛,「國酒」供不應求,價格比諸當年更不知翻了多少番。所以茅台集團去年盈利大增至80幾億元(人民幣.下同),不過尚未及其上繳貴州省政府的90多億元稅金。如此經濟效益,我想就算周總理活到現在,也不一定能想得明白。
至於銷售收入則達到240億元,而當中起碼有一半係作公務用途,咁即係有成百億元,淨係全國「兩會」其間用嚟招呼來自各省市、數以千計的人大政協、各級幹部的用量,睇怕都可以注滿幾個水立方。雖然近年亦有領導表示,關注茅台的價格飆升,並上綱至拉動了「公費吃喝」開支的大幅上揚,不過對照以下嘅官方數據,卻又是劇情犯駁。而另一慷慨說法,就係因有公費宴酒先導致為國為民逼不得要奢飲侈食的官員,身受三高及脂肪肝等「職業病」折騰之苦喎!不過就算沒有這些名酒,「夠(受的)官」怕且從老百姓身上刮來的民脂民膏,也早已堵塞了他們的血管。

兩會飲茅台 注滿幾個水立方

且看另一些官方公告的數字,中央的「三公」支出費用,即係除咗「公費吃喝」仲有「公車消費」同埋「公款出國」,總計一年都只不過係90幾億元咋,求其搵個部級幹部嘅身家都唔止呢個數。而吃喝消費更是寒酸,得嗰15億元,莫講話付酒錢,現時茅台造假猖獗(銷售量係產量嘅十倍),淨買個樽就已經咁上下。而比對國家年度財政收入9萬億元(呢個數就實淨好多)計,只不過幾個點子,足證此項使費在中央眼中實微不足道。而身負重任嘅「兩會」委員代表,竟連呢啲芝麻小數都要傷神,亦難怪佢哋無暇分顧嗰位李旺陽。
說實話,我到現在還學不懂欣賞「國酒」,亦怕酒後「上頭」,卻想從中了解內地現象,只因對很多事情還是「上心」。
盧先亞

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載