› 選擇地區
三藩市
紐約
洛杉磯
其他美國地區
香港 台灣 北美
 
2012年07月13日

智取大市:東電14蚊不容有失 - 晉佳

之前講到環球股市、滙市充滿味,似乎就嚟展開跌勢,晉佳認為,後市跌幾多,視乎歐元兌美元能唔能夠守住1.20嘅支持位,如果守唔住,港股就有排跌。以基本因素支持者嘅角度,歐元繼續跌,係眾望所歸嘅事,跌穿1.20又有乜出奇。
近期最強勢嘅股份板塊有醫藥股、電力股、本地地產股,最弱就有內銀股、資源股,當股份兩極化已經成為街知巷聞嘅事,咁下一步就係出現單邊市,至於單邊升定單邊跌呢?既然話聞到味,即係美滙有急升兆頭,股市開始向下兼技術指標突然向淡,就梗係睇跌。
撇除近日講過嘅中長線利淡技術指標,大家亦可以留意埋恒指周線圖MACD,其實上星期似想形成買入信號,只要今個星期恒指唔跌就能夠形成,點知今個星期(未計今日)就偏偏下跌,令MACD熊差距再度擴闊,睇嚟未必能出現買入訊號。如果買入訊號臨門一腳未能形成,之後嘅發展,通常都係大跌。金融海嘯之前嘅08年8月第一個星期,恒指開始下跌,MACD就係差嗰少少,最終形成唔到買入訊號,之後發展唔使多講。至於舊年1月同4月,恒指周線圖亦有兩次差少少而未能形成買入訊號,結果由高位24000點樓上,跌到去10月初接近16000點。講到呢度,真係發現乜嘢中長線關鍵技術指標都衰,都咪話唔驚!

大市技術指標樣衰

噚日睇公仔箱,有觀眾問東方電氣(1072)得唔得!晉佳覺得,佢嘅基本因素好明顯唔得。家內地經濟增長都唔多爽,企業資金緊張,生產力又唔係話提升就提升。喺呢個情況下,用電唔慌有大增長,發電企業窮到燶,就更加唔願意買新設備去改善生產效能,電力設備定單自然會少。同時,電力設備股唔能夠受惠煤炭價格下跌而令成本降低嘅好處,所以電力股同電力設備股走勢又係一個兩極化。
不過,睇圖嘅話,東方電氣由舊年12月到家,形成咗下降通道,目前就跌到去下降通道底部,按理初步會有支持,不過睇嚟都係暫時性。家陣市況唔就,有貨喺手,見到股價喺呢幾日彈唔起仲要跌穿14蚊,連下降通道底部都守唔住,就要小心直線下跌,所以都係定14蚊短線止蝕吧。

晉佳
本欄逢周一、三及五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載