› 選擇地區
三藩市
紐約
洛杉磯
其他美國地區
香港 台灣 北美
 
2012年07月24日

金手指:四面楚歌滙控必跌 - 孫柏文

上個禮拜四,即滙控(005)最高見67.7元嗰日,孫柏文喺本欄應承大家,今日會解釋點解滙控會快見60元。
喺《金手指》一欄,由六年幾前創欄至今,滙控喺本欄出現過唔少次,照我記憶,冇次好。
冇辦法,六年前,滙控仲季季報業績時,玩緊佢哋嘅「三腳櫈」策略,即英、美、亞三個主要市場推動。
如果你坐咗落呢張櫈,做咗股東,唔係話少咗隻腳搞到向後翻騰咁簡單,直情係隻櫈腳穿咗個櫈面,插到股東嘅屁股「屙拔甩」。
唔同意嘅,多都唔使,可以睇番09年3月時嘅新聞,嫌視覺上唔夠震撼,可以睇番隔離一欄,我至尊敬嘅青姐,喺當時直播節目中為滙控股東流下嘅一滴淚(之後呢滴淚變成「青淚劍」,劈死咗神憎鬼厭嘅收市競價時段)。
如果你當時到家都係滙控股東,相信唔使提你都清楚,用咗好多年積埋嘅股息,一鋪過以供股形式畀番滙控。
滙控家四面楚歌,先有捲入倫敦離岸美元同業拆息(LIBOR)造假嫌疑,再有花旗國會話佢哋幫盡天下「壞人」,由墨西哥大毒梟,到支持回教恐怖份子嘅中東銀行。

乜都唔畀點做生意

雖然滙控由創辦至今,一路都抱住香港精神咁去做生意,即英雄抬錢來莫問出處,同埋同行做嘢長線要畀面,不過後果就係搞到銀行睇實員工做嘢有冇合規定嘅嗰位Compliance阿頭要起身。
個解讀係以前滙控上上下下都知尺度係點,家就係Compliance冇話唔畀就會去做。
咁結果係點?如果花旗政府再打壓(啲美資銀行一定叫國會施壓去搶生意),滙控就會由「積極不干預」,變成乜都唔畀。連生意都唔敢做,到時點賺錢呢?滙控睇怕有排跌囉。

孫柏文
作者為獨立股評人
本欄逢周二、四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載