› 選擇地區
三藩市
紐約
洛杉磯
其他美國地區
香港 台灣 北美
 
2012年08月07日

中門大開:民生無小事 問你死未 - 添馬男

梁振英似足家英哥在《國產零零漆》的角色,經常煞有介事地講出一堆廢話空話。

特首休假暫避熱廚房,休假前接受訪問,一貫廢話連篇,滿口陳腔濫調。越睇佢越似羅家英演技,用好很誠懇嘅表情、聲線同態度,講出一堆廢話空話,Bullshit一番。睇怕佢真係家英哥fans,似足《國產零零漆》內之「聞西」,每次出場,均煞有介事地用極之嚴肅語氣介紹極之無聊的殺人武器,問你死未。

廢話連篇內容欠奉

振英掛在口邊四字金句一堆堆,好似「民生無小事」,用過不少次。這是廢話一種,可以變出同類句子,包括:僭建無小事、政治無小事、選舉無小事、愛國無小事、民意無小事諸如此類,這些句子可以用,但只能作為開場白,後邊應該跟住一堆具體政策建議,以作主體內容。但梁振英由競選開始,一直至今掌握實權,都係將序言、引言變成內容,虛話形勢分析一大堆,問題一籮籮,但實質答案欠奉。
虛話廢話只係用來烘托氣氛,係一種語言偽術工程,但就決不能取代實際內容。例如當討論中菲南海衝突,一大堆中美外交戰略形勢分析,乜嘢美國重返亞洲後戰略部署,但最核心問題係「打、定唔打」,就結論欠奉,呢類典型廢噏分析,內地媒體多的是。
本來在老董年代早已充斥呢種虛話浮誇風,人人講咗當做咗,分析形勢一大堆,具體施政一事無成。所以曾蔭權上台時便提出務實主義作為施政新風,得到民意支持,但因社會矛盾擴大,民粹主義被煽動起來,大家放下常識理性,跟從魔笛,竟然相信有一種求變藥,一服之後可以解決民生大小問題。
你信唔信?反正好多香港人就信了。到今日連似模似樣嘅政策討論,諸如退休保障、標準工時都不曾展開,所謂新政,就只是沿用曾朝派糖。呢劑香港人大有可能遇上了政治寶藥黨了,往後所謂新政,只有「民生無小事」呢類空話廢話,問你死未?

添馬男

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載