› 選擇地區
三藩市
紐約
洛杉磯
其他美國地區
香港 台灣 北美
 
2012年08月16日

好不主席:東主有喜

主席東主有喜,休息一天,只以面具照示人。

編按:金融中心一周年誌慶,盧主席自行迎(唔係盈)喜,休息一天,由其小秘(書)Joycelyn代筆。
去年噚日,一向過度活躍、又唔食藥,成日喺公司幾層辦公室好似「實蕉」咁巡樓嘅老細,忽然在下午茶黃金時段關上房門,低頭沉思,不時手篤篤部智能手機,似是向外發訊息,又似是記下一些重要事情,房內氣氛似乎好沉重。嘩,唔好話臨放工先嚟發通告呀!我已經約咗啲朋友飲嘢。等等等,卒之放工時間,正準備急腳閃人,老細忽然打開房門,然後煞有介事地問我︰「Joycelyn,煞有介事個「煞」字點寫呀?」係咁之嘛,你試吓要我留低再做其他嘢,我一定寫個「殺」字畀你。

主席口沒遮攔 得罪人多

之後,就幾乎每日都係咁,一到四點幾五點,佢就好似上咗身咁,做其「隱蔽男」,失驚無神就問我呢個字點寫,嗰句成語又係咪咁,仲成日有啲粗俗用語,如果我唔係睇開蘋果,都真係幫佢唔到。好多同事都問我老細搞乜,我呢啲咁醒嘅秘書又點會露口風,查實係我都唔知。
直到有次佢出差,返港前喺機場打電話畀我,嗌晒救命話部手機就嚟冇電,然後叫我趕緊開咗佢部電腦,打開某個存檔,搵到其中一篇文,佢就開始一輪嘴咁口述要我幫手筆錄,將嗰篇文略加潤飾,再送件出去,我淨係留意到其中一個收件人姓「TSOI」,英文名就係「Tony」。第日佢一返到公司就叫咗我入房,再而和盤托出。佢份人冇乜好,就係講大話嘅水平同啲高官不相伯仲,不過貴在自知,所以一有乜事就坦白從寬。
其實寫專欄啫,又唔係搞明星(係就好啦,起碼有料爆畀人聽),使唔使咁神秘呀?我心忖。仲要隱姓埋名,九唔搭八咁用埋乜「盧先亞」做筆名?不過睇多幾篇,諗深一層就心中有數,佢都真係好唔妥,寫嘢同佢平時講嘢一樣,都係口沒遮攔,正是「得罪人多,稱呼人少」。其實佢對家陣啲政治人物暗諷明嘲,或者對政事時事多多意見,咬牙切齒都冇乜問題,因為全港都喺度鬧,多佢一個唔多。況且要成日返大陸公幹嘅係老細你,而我就淨係會上去揼骨啫。不過你唔覺唔覺就筆伐了唔少政商大人物,做生意求財啫,又唔係求名(係你就出真名啦)求氣,都唔知為乜。總之就唔好搞到公司,仲影響埋我份工。
另外,你又好似同班怪獸家長(無意冒犯,不過跟我老細叫啫)有仇咁,日鬧夜鬧,其實都真係有唔少係我哋公司產品啲顧客,又倒自己米,你睇住我年底份花紅先得㗎!

不過好彩,盧太耐唔耐就會送啲Facial套票畀我,我生日佢仲(暗地)豪買咗個BV袋畀我,老細到家陣都仲以為係我男友送嘅。點解對我咁好,我青春貌美就固之然,最緊要係佢都察覺到盧生返到屋企都仲成日拎住部手機篤篤篤,當生疑慮。所以咪囑託我要多加留意,小心實,隨時滙報囉。
有時見到主席佢寫文嗰陣嘅痛苦,我亦有小小不忍,不過一諗到出年又會有個新袋,你就畀心機繼續寫啦!我最多盡晒人事幫你頂咗呢篇。
Joycelyn

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載