› 選擇地區
三藩市
紐約
洛杉磯
其他美國地區
香港 台灣 北美
 
2012年08月17日

智取大市:雅居樂績佳中線睇11蚊 - 晉佳

港股連續兩日出現較顯著調整,成交略縮,喺人心虛怯下,短線方向未定。二三線貨乾到無倫,基本上任由大戶舞高弄低,就講隻中國利郎(1234),前日中午公佈業績,盈利增長兼派高息,午後曾搶升近一成,收市前竟一度倒跌,但翌日又急升9%。如果業績後撲入去,即日好易被震走,投資者對後市冇信心嘅話,短炒一定俾大戶恰死。由於晉佳中線睇好大市,建議買貨後保持定力,宜長揸、忌短炒。
噚日中午有3間內房股公佈業績,分別係雅居樂(3383)、富力地產(2777)同SOHO中國(410),呢期業績可以睇到優勝劣敗之餘,亦可見3種內房股嘅唔同遭遇,值得拎出嚟研究。
內地樓盤銷售至竣工約有幾個月時差,所以上半年業績,基本上係反映舊年下半年嘅市況。舊年下半年面對歐債危機、溫州資金鏈斷裂等問題,樓市差、業績差係意料中事。不過所得稅開支降低,有利內房盈利表現之餘,亦令現金流增加,係好事。
雅居樂算係業績較好,上半年純利只跌1%至20.7億元人民幣,唔計所得稅開支大減三成,稅前盈利雖大跌25%,但咁差嘅銷售環境下,表現已經唔錯。由於估值已反映不利消息,包括內房可能面對資金鏈斷裂、中央調控唔鬆綁等,年度化市盈率只得6倍,但今年上半年內房銷售大為改善,全年市盈率一定遠低過上半年嘅年度化水平,估值偏低。

富力財務壓力大

富力喺金融海嘯之前「也文也武」,但面對沉重嘅債務問題,財務成本加上隱藏喺銷售成本嘅利率資本化支出,侵蝕盈利;雖然淨資產負債比率同雅居樂差不多,分別係104%同91%,但係富力上半年收入84億元,低過雅居樂嘅118億元,但富力承擔利息開支13億元,仲多過雅居樂嘅12億元,反映富力財務壓力較大。
賣樓正常係貨如輪轉嘅策略優勝,但SOHO潘石屹就諗住自己能夠準確掌握行業情況,所以採取唔平唔買地,擇肥而噬嘅策略,搞到冇樓賣,一隻冇樓賣嘅內房股,點會有好業績。3隻內房股貨比貨,中線股價表現應該以雅居樂最好,可考慮現價買入,中線睇阻力位11蚊。
晉佳

本欄逢周一、三及五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載