› 選擇地區
三藩市
紐約
洛杉磯
其他美國地區
香港 台灣 北美
 
2012年08月23日

中門大開:振英蛇齋餅糉路線 - 添馬男

梁振英巡視行人天橋加裝電梯,擺到明係抽水。

梁振英可以話係真正抽水王,總之有mileage,就必定出場曝光。大政策做唔到,有爭議就閃開,齋做民生派糖活動。最近巡視行人天橋加裝電梯,擺到明係抽水,上次就巡視老人兩蚊搭車優惠。
振英走蛇齋餅糉宣傳路線,算到好盡,一來用官媒,即使文字記者不滿,就算冷處理有關新聞也好,只要出到免費電視,就有着數。官媒發片或做集體採訪,至少減低文字記者殺傷力,因為一去到現場,記者天職就乜嘢都問,唔會跟住振英劇本去配合,好似巡視天橋Show,記者去到必定追問「膠波夫婦」吊臂式露台劏房危害公眾安全,應否立即下台,又或者佢本人僭建幾時交代,最後公關Show變質,正面宣傳效果消失。
蛇齋餅糉路線,一直係政黨地區工作路線,八十年代民主派以居民運動、維權方式介入社區,搞拆遷補償、重建爭取居民支持,奠下民主派地區工作模式。建制派就走社區福利模式,因為要撐政府,政策上冇可能激,所以就多做訪貧問苦、蛇齋餅糉,爭取居民支持。30年來,兩條地區政治路線已合流,民主黨也做蛇齋餅糉,民建聯也非事事保皇,一樣要在地區做維權工作。而政府在地區中的政治角色也轉變成為「球證」,地區專員以分配資源討好各方,家家有求。

截劫建制政黨「功勞」

當振英重拾蛇齋餅糉工作模式,最受影響會係建制派地區工作。起行人電梯Show劇本應是建制派約見張炳良,大家整色整水一輪,最後張炳良宣佈接受建議,用十億改善全港天橋,再跟手同日建制派地區議員及當區立法會議員將早已印備「成功爭取全港天橋加建電梯」的banner掛上。家由梁振英中途截劫,佢做咗成功爭取嗰個,動用政府宣傳資源自吹自擂,其他人冇位企。
走蛇齋餅糉路線,短期可以改善振英形象,用溫總式訪貧問苦包裝自己,再活用官媒控制訊息發放。但政治代價是日後與建制政黨越行越遠,利益共生關係消失。
如果政府要堅定不移用蛇齋餅糉對抗公民社會,下一步不如定期落區接Case,做到盡,抽乾水為止。
添馬男

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載