› 選擇地區
三藩市
紐約
洛杉磯
其他美國地區
香港 台灣 北美
 
2012年08月24日

智取大市:中建築半年睇升36% - 晉佳

近排唔少股份公佈中期業績後,股價爆升,例如之前介紹嘅雅士利(1230),升到噚日都未識停,走勢強勁;亨得利(3389)放榜後股價亦衝上去。至於中國建築(3311)業績靚但股價回吐,雖然仲喺高位附近,但已經值得逢低吸納。
中建築上半年營業額升48%至104.88億元,生意好到嚇親人,毛利上升71.6%至10.05億元,毛利率就由9.7%升到11.2%,純利升35.8%至8.87億元,每股盈利24.73仙,業績可謂冇得彈。
內地嘅保障房項目,令建築需求增加,中建築接單接到手軟,收入持續上升係意料之中。截至7月,公司新簽合約額高達294億元,所以將全年新簽合約額目標由年初嘅331億元,上調到350億元,晉佳估計去到年底好有機會超標。中建築上半年保障房項目毛利率升1.4個百分點至8.5%,真係相當好賺,未來又會增加較高毛利嘅BT(建築及移交)項目,毛利率應該Keep住有上升空間,係市場上買少見少嘅增長概念股,應該繼續會受市場追捧。
今年7月中,中建築曾配股集資22.3億元,現價已升返去配股前水平,反映市場對股份有需求。建築行業需要資金周轉,配股集資亦反映佢要迎接未來增長嘅生意,係好兆頭。
中建築上半年每股盈利24.73仙,保守計當下半年較上半年增長10%,年底市盈率都只係16.2倍,估值仍有上升空間,如果稍後市況靠穩,以市盈率22倍作為目標價,半年升見11.50元唔過份,潛在升幅36%。

利邦績差 換馬亨得利

至於之前介紹過嘅利邦(891)啱啱公佈業績,半年經營溢利只升1.8%,存貨周轉天數升到407天,令晉佳十分失望,有貨揸手嘅可以趁反彈換馬,轉吸經常性盈利同樣冇乜增長,但係估值低得多嘅亨得利。
另外值得一提嘅,係越南銀行業大亨阮德堅(NguyenDucKien)因非法經濟活動被捕,拖累越南股市連插3日,跌幅足足有一成。呢位富豪喺越南擁有幾間銀行股權,影響力強大,佢俾人拉咗,唔知會唔會阻礙銀行業重組進度,晉佳稍後會再同大家研究吓,睇睇係咪有長線撈底機會。
晉佳

本欄逢周一、三及五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載