蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年08月27日

最低工資搞亂檔 酒樓苦工冇人吼
經理也洗碗

【企業求存】

最低工資實施一年多以來,對工作較辛苦的餐飲業打擊至大,尤其洗碗及侍應人手嚴重流失,結果服務質素顯著下降,「茶客舉咗好耐手都冇人理!甚至連經理都要幫手洗碗」。記者:周燕芬

相關新聞:福利不再樓價高企cut宿舍

經營逾30間酒樓連鎖店的新光酒樓集團創辦人胡珠坦言,近一年本港酒樓業服務質素顯著下降。「呢一年嚟埋單畀多咗錢,但服務就少咗……冇人開茶、冇人落菜單、冇人埋單……舉咗好耐手都冇人理!」勞工短缺正嚴重影響本港餐飲業的服務質素。
胡珠力數餐飲業服務質素下降,每句說話都倒自己米,他直指,現時酒樓面對最大的難題是「請人最慘,巧婦難為無米炊,有工請唔到人用。」尤其是酒樓的基層工種,包括洗碗、傳菜、潔淨和點心師傅等。
胡珠認為,去年中實施最低工資後,變成「做又卅六,唔做又卅六」,都可取得28元時薪,所以大家都要搵份好工做,辛苦工冇人吼。

被迫時薪$50請人洗碗

餐飲業工作量大,又多粗重工夫;很多基層員工都轉去做大廈管理員或清潔之類的較舒服工種,現有員工就此流失了一部份。另一方面,生力軍亦接不上,年輕人怕辛苦不願入餐飲行業。他指,有些綜援個案其實「好得閒」,勞工處曾經介紹過綜援人士來酒樓打工,「點知試過做半日就走咗去,喺後樓梯靜雞雞將件衫除咗就走人……唔鍾意俾人呼呼喝喝。」
胡珠稱,以最低工資28元早已請不到洗碗工;以前洗碗工時薪約25、26元,現在要30元以上才可以請到人;個別行家於中環區出手更高達40、50元。點心師傅又是另一重災區,因為要早起身,凌晨3時瞓到最甜時刻就要起床,因為茶客晨早6時便到酒樓嘆茶,要提供新鮮點心。

相關新聞:市民慳錢着數時段旺過午市

經理變阿四 乜都要做

現在一間酒樓缺十個、八個人手是普遍現象。至於如何應對,他形容為「八仙過海,各顯神通」!一是加薪請人;或者臨時調配人手,甚至由經理幫手「洗大餅」,搬枱搬凳也要落手落腳做。
讀完書就做酒樓樓面的吳謹興,努力逾十年,終等到工字出頭天,現於新光集團旗下百樂門宴會廳做經理,一身白恤衫西褲打領呔的吳謹興,帶領約30位員工,全日服務100張大小枱的客人,記者訪問的當日下午,午市剛過,食客紛紛離開之際,只見吳謹興急忙走入廚房戴上膠手套,與洗碗阿姐一齊洗碗,他更形容自己是一個「百搭」員工。

不願入行 請人有困難

經理本來是要指揮下屬做事,現在卻要落手落腳做埋一份。他解釋,洗碗工原本要五個人,現時只有兩人工作,「請咗兩、三個月都請唔到人,出面啲人都唔想入呢行,惟有自己做埋。」他表示,現時自己「乜都要做,洗碗、執枱……經理可以叫做百搭。」即使請到人也未必「啱用」,有些應徵者不夠禮貌,不適合服務業,他最希望可以搵到又快手又聽話員工。
他現在每天工作時間約11個小時,每日晚上11時半左右放工;若有喜慶飲宴,更要做至凌晨12時過後才可以收工。若閒日晚上生意較少,則可提早放工當作補鐘。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載