› 選擇地區
三藩市
紐約
洛杉磯
其他美國地區
香港 台灣 北美
 
2012年08月28日

金手指:歐央行就快發炮? - 孫柏文

孫柏文未夾到脷之前,接受雜誌訪問,嗰位靚女記者喺訪問過程中,就細心觀察我平時「做嘢」點做,點樣去攞寫作同開咪時嘅靈感。佢觀察完之後就話:「你哋班友基本上坐晒喺『獅子山學會』度,淨係吹水喎。」
作為香港唯一爭取可行政策嘅智庫組織,其中一個我哋會吹嘅議題,就係歐洲信貸危機可以點解決,同埋更重要嘅,吹歐洲信貸危機最終會點解決。
早成年幾前,我哋嘅行政總監王弼已經話:「歐洲個結果好簡單,就係德國將會完成佢哋百幾年來嘅目標,就係統治全歐洲。不過今次唔需要飛機、大炮、坦克車,只要啲西裝帶呔嘅官員就得。」

印鈔涉主權 冇咁易

家有好多老外財演,都話歐央行不但就快會有支迫擊炮,仲會攞支炮來射,鈔票做子彈。我之前8月7日《金手指》曾講過話歐央行印鈔未講條件,仲要係除我之外,西班牙政府都係呢條line,所以佢哋先未打印鈔999。
喺啱啱過咗嘅周末,德總理就表態,話所有要接濟嘅政府,要接受被控制稅收、開支的一個外來機制。稅收、開支乃一國主權最核心嘅地方,各歐豬國會接受咩?唔接受,德國會向印鈔說得嗎?
仲有,個外來監控歐豬政府嘅機制,係要鐵一般咁實在,因為早前嘅LTRO,Target 2等,全部喺德國人民心目中都係被人搵笨。咁俾你呃一次就係你衰,俾你呃第二次就係我戇居,今次真係要寫清寫楚先。
不過最難係歐豬人民嗰關。大家試想像吓,如果有一日我哋中國好似啲歐豬咁因借貸過度要被接濟。日本話:「好,我可以救你,仲接受釣魚台係你哋嘅。不過救你條件係要你賣釣魚台,東京市政府出價最高,賣畀佢啦。之後嘅錢,唔會經你手,直接幫你還債畀啲日本銀行,大丈夫?」各位fan屎,你哋覺得ok嗎?

孫柏文
作者為獨立股評人
本欄逢周二、四刊出
http://facebook.com/shuen

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載