› 選擇地區
三藩市
紐約
洛杉磯
其他美國地區
香港 台灣 北美
 
2012年08月28日

中環在線:時富高層愁爆放無薪假 - 李華華

一講到放無薪假縮皮,即刻諗起國泰航空(293),但原來金魚缸冇水,證券行都要借呢條橋嚟用。聽聞,時富證券正考慮要求幾位高層自願放無薪假,最長要放兩個月。
港股成交咁奀,噚日連400億都冇,華資證券行個餅已經越來越細,但佣金就越鬥越離譜,四年間由5蚊劈到3.68蚊,兼送免佣券,等於免費咁滯,有啲一直堅持唔減佣嘅證券行唔想流失啲客,無可奈何都要平埋一份。

經紀兼職 麻雀館戥腳

啱啱推出「一開十」即日孖展優惠嘅時富,據講打算同時向高層開刀,要求幾位高層放無薪假,有啲下個月開始放,最長放兩個月,咁長時間,真係玩轉成個南美都得。
有證券行高層聽見時富用到呢招都冇乜反應,指扣埋輪證,家陣每日成交仲衰過沙士嗰陣,最慘係見唔到隧道口嘅一點光,都唔知衰到幾時。查實好多本地證券行都喺度諗計縮皮,出到無薪假呢招一啲都唔奇,共度時艱吖嘛。
高層放無薪假已經算係咁,經紀收入同個市掛鈎,好多經紀要做多兩份工呀。除咗收市轉揸的士同網上賣嘢,新近聽到一啲經紀收市後,走去麻雀館做戥腳,人工好到隨時變成正職都得。「一枱麻雀,有齊四隻腳已經有得打,對住部大利市機,沽貨都冇人接啦!」你話幾咁欷歔。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載