› 選擇地區
三藩市
紐約
洛杉磯
其他美國地區
香港 台灣 北美
 
2012年08月28日

好不主席:是但選美 - 盧先亞

有朋友發群組訊息問會唔會投票,我仲以為係講緊9/9,然後才知道原來竟然係港姐搞普選。不過大鑼大鼓宣揚(可惜我都係唔知)的一人一票選港姐,最後竟然因為「網絡癱瘓/伺服器冧檔(乜都好啦,只係一個說法)」而宣告難產,引致全城譁然,面書也被洗版,「是但」台果然名不虛傳。事後好多人都感懷身世咁話乜當日係香港民主最黑暗嘅一天喎。計正,市民從來都冇真正享有過全民投票嘅權利,日日咪都係一樣咁無光。就算日後所謂嘅特首普選,到最後睇怕都係假民主真欽點嘅一場秀,大家只有繼續「暗中作樂」。

劇本已寫好 冇得上訴

其實我已經好耐無睇過香港小姐選舉,近十幾廿年對港姐的面目都好模糊。過往出席嘅社交場合,總有機會邂逅唔少漂亮的女生,不過通常我都唔知邊個打邊個,包括啲藝人同埋啲乜姐,直到勞煩公關大員趁機通傳,我先會「哦」一聲。我一向覺得香港啲靚女都唔少,雖則祖國地大物博,啲女仲索,然「港女」嘅打扮同衣着方面,始終較為懂得以瑕掩瑜。而港姐,幾經包裝,點都見得吓人,況且更要有膽量企喺台度俾人評頭品足,奉旨「被抽水」,都真係要有相當嘅心理質素,不過呢啲亦都係矢志進入花花世界的必然經歷。
除了選美,其實是但台每年的金曲選舉都係一樣,甚麼一人一票,選出心水歌曲,最後全部都係幕後交易,黑箱作業,未選都已知誰人會攞到「太陽系最受歡迎男歌手獎」。所以呢次「普選」竟然能夠起哄,一就係視民太傻太天真;二就係我哋壓抑太久,求其見到啲疑似「普選」物體都趨之若鶩。
話說回頭,呢件事不期然令人想起一直不了了之的三間免費電視台發牌事宜。香港電視水準低落已是有目共睹,癥結之處就是在於強弱懸殊,缺乏競爭。市場普遍期望引入新競爭者能夠提升節目水平,奈何發牌事宜一拖再拖,新管治班子上場以來,呢件事更似是石沉大海,令人不禁替之前不惜賣了自己產業全情投入電視王國的電訊大王擔心。而睇怕今年嘅毅行道上亦不會見其蹤影。
現在的電視經營市場,大部份視民對於「是但求其」的製作都能夠處之泰然,這種盲目,才教人心寒,果然「怎樣的觀眾就會造就了怎樣的媒體。」而近期多宗事例都已響起預警,很多事情係會在不知不覺間成為了既定的事實,例如新界東北邊界模糊化,以及近日內地忽然單方面宣佈,9月1日起放寬非深圳戶籍居民申請「一簽多行」來港自由行。事前低調或毫無諮詢,然後高調快速實行,殺一個措手不及,反對都嚟唔切。情況就好似港姐選舉一樣,十分鐘投票時間完咗,先話冧機,重選?冇可能,因為劇本早已寫好,塵埃也然落定。
盧先亞

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載