› 選擇地區
三藩市
紐約
洛杉磯
其他美國地區
香港 台灣 北美
 
2012年09月03日

中門大開:同振英對賭 - 添馬男

梁振英

樓巿十虛招出台,地產商發覺原來虛驚一場,官商界對梁振英能力,又多咗一重認識。梁振英靠乜嘢攞民心上台?就係借巿民對高樓價不滿,將社會矛盾挑出,再繪畫出「求變」美好將來,成功爭取到梁粉及中產媒體如《明報》的支持。

難增土地供應 亂噏當秘笈

但稍有常識理性嘅人,都知道樓巿受冰火煎熬,邊有一時三刻解決捷徑,有嘅都屬寶藥黨呃人。自老董年代推出孫九招谷起樓巿後,政府停居屋、停賣地,停止造地,起初冇乜大問題,借收縮供應來抬起樓價,04、05年後由谷底回升,但仍然未到急升,所以06年煲呔競選時冇人提樓巿,重點反而係就業。其間孫九招政策下,地政署也停止造地,巿區靚地曬太陽,好似港島地王北角邨清拆後,就變咗停車場。08年金融海嘯後,全球狂印銀紙,內地照跟,長期低息環境,唔買樓就笨,結果供應少需求多,樓巿一發不可收拾。但要增加供應,有一定規律,冇話要有地就有。土地供應有幾多來源,一是新開墾土地,政府要做好基建,成為可供拍賣起樓的「熟地」。

樓價升趕走梁粉 出招止咳

二是巿區重建及新規劃改用途,如工業用地、社區設施用地,呢類地表面好似比造地快,但重建涉及收樓賠償,改用途要過城規會,又有法定駁上訴程序,區議會又反對,分分鐘成兩三年。建築期不論公屋、居屋、私樓相差不遠,所謂蹉跎歲月,其實是之前規劃及諮詢程序,當中法定程序,冇得好似內地提速,話收地就收地,話改用途就改用途,梁振英當初亂噏當秘笈,以為憑長官意志可以提速,結果令社會對解決樓市期望不斷升溫。他心知樓價急升,會趕走最後一位梁粉,大家對佢搞普選,捍衞高度自治冇期望,但處理房屋問題都撻Q,就冇得解釋,結果形成了房屋政策短期化行為,以回應民怨,意圖止咳。先有應付7月中立法會答問大會,便推出居屋轉售白表免補地價,立即谷到居屋放售成萬蚊呎。8月底推出十虛招,後果會點?大家睇睇上周六日睇樓情況就知。添馬男

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載