› 選擇地區
三藩市
紐約
洛杉磯
其他美國地區
香港 台灣 北美
 
2012年09月05日

智取大市:中升就嚟見曙光 - 晉佳

噚日本報有篇報道,講到深圳限購令明年初或之前都唔會推出,睇嚟其他省市都唔會咁快有限購,對汽車代理股嚟講,反而唔算係好消息,因為冇得打限購促銷牌,咁就好難去埋啲存貨。市場認為一旦個市場好番啲,豪華車去貨應該會比普通日系車快啲,因為始終內地富豪多,搶住買貴車晒命,咁嘅話,賣寶馬嘅正通汽車(1728)係咪好過主力賣日系車嘅中升控股(881)呢?晉佳又唔係咁睇喎,既然市場難捱,當然就以競爭力、經營能力行先,長遠嚟睇,喺經濟過咗增長高峯期下,應該會各自各精采。中升舊年收入上升48%至242.57億元(人民幣.下同),純利跌27.4%至3.71億元,每股盈利19分,睇條數似乎麻麻。不過,中升上半年高毛利嘅售後業務收入上升63.5%至22.89億元,呢Part毛利率47.1%,淨係呢瓣已經佔整體毛利一半。睇番上半年新車銷量升五成至90876萬架,呢批新車未來帶嚟嘅滯後售後業務收入估計會繼續大幅增長,肯定Cover嚟緊打折賣車去庫存而賺少咗嘅錢。中升庫存高、負債重,等住資金回龍,同時可能要應付生產商攞啲新車嚟賣,所以下半年應該會繼續打折賣車,壓低毛利率,賣車盈利可能未見底;不過,售後服務收入不斷膨脹,毛利率穩定,盈利斷估最遲出年上半年見底回升,如果車市好轉,連賣車毛利都回復增長,盈利爆發性就更唔講得少。

中線目標13元

6月底中升淨資產負債比率153%,令上半年融資成本升1.2倍至5億元,稅前盈利因此由升轉跌,不過長遠應該都冇有怕,因為中升嘅資產主要係汽車庫存,容易變賣,而負債以短債為主,未來只要庫存有機會加速變賣就能夠還錢,順便降低負債水平,融資成本自然下降,有助盈利表現。《蘋果》噚日篇報道亦講到,中升深圳分店偏遠,但人流算多,雖然講話限購令之前趕買車,所以多人睇,但晉佳相信中升產品多元化,競爭力強,都係多人睇車嘅原因。策略方面,股價升破10蚊就可以追入,中線睇13港元,明顯跌穿9.50同9港元,就分段止蝕。晉佳本欄逢周一、三及五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載