› 選擇地區
三藩市
紐約
洛杉磯
其他美國地區
香港 台灣 北美
 
2012年09月05日

好不主席:爆血焦點 - 盧先亞

亞視前晚播出的反國教節目惹起民憤。

昨天按時例行見醫生,稍作檢查後,醫生說我的血壓偏高,最近是否工作壓力很大,我心想嗰啲頻發盈警、股價插水嘅上市公司主席都未傳噩耗,咁幾時輪到我呢。跟住佢又旁敲側擊問係咪同老婆嗌霎?我話呢排盧太都好忙,大家見面時間都得咁少,咁邊得閒吵啫。我見佢一面狐疑就從實招來,我話搭車過嚟醫務所嗰陣,啱啱喺手機睇完亞視條片,短短不過幾分鐘卻已教我扯晒火,血壓讀數不過係反映爆「怒」程度。佢深知我脾性,所以聽完之後淨係話冇睇開就無謂睇啦,免得又要加我藥。

投訴多過收視 亞視威番次

其實個節目係前晚播出嘅《ATV焦點》,內容直指反國教只是有人為選舉而製造的議題,並且提到參加反國教的年輕人,亦即學民思潮的一眾都不過是別人的棋子。當中仲將「建制派」美名為「建設派」,而另外一邊順理成章就被打成「破壞派」!我都真係反覆睇咗幾次(所以點解血壓會瞬間飆升),先確定呢條片並非二次創作嘅惡搞作品,而係真真正正曾係向全港廣播。如果有人話「事旦台」係CCTVB,咁各位真係要上網搵番亞視呢條片睇吓,因為中央台嘅播放我哋都仲有機會喺內地睇到,但係要有北韓嗰隻咁重口味嘅電視節目,我哋都真係不得不睇,不過好似我呢啲病患者當然要小心。而讚嘆之後,請跟手登入廣管局嘅網址去回應一下。尤其係其他劇集講兩句粗俗語都話會教壞細路,咁呢啲壞腦節目更加冇理由唔篤爛佢囉。為減省閣下寶貴時間,我已代擬投訴內容,就係:「節目偏頗失實,亦欠中立公允,明顯違反選舉公平報道原則,而蓄意誤導市民及抹黑學生的手法,更連身為媒體最基本要守住的新聞底線都不知所終,這樣的傳媒機構竟仍佔據香港寶貴的大氣電波,唔係呀化?」其實原來較早之前還有另外一集不遑多讓的膠片,還借當年抗日戰爭勝利後,毛澤東親赴重慶面見蔣介石,要求國民黨放棄一黨獨大,組織一個包容各黨派聯合政府的立場,即係權力分贓。並以資說明縱然有如國共之仇,都可以有偈傾,而學民思潮卻由始都堅拒加入「國教委員會」,以致白白錯失在框架內表達「不同」意見的機會。還藉機嘲諷學生不知歷史,正正需要國民教育!事實上,毋須多辯,只要回看今天那個政權才是一黨專政,那個偉大的領袖可以發動連綿人禍,造成數以千萬計的生命塗炭。惟這些教人憤慨的史實,竟可反過來成為正面的例子,我們又再一次體會到國教顛倒黑白的神效,當然還有呢個「焦點」有幾蕉!現在唯一的缺口是,亞視可能以投訴數字不符現實狀況抗辯,因投訴人數好大機會係多過當晚曾收看的觀眾,睇怕呢劑都創咗電視界嘅先河,亞視終於可以揚名立萬。至於其他話乜要杯葛同埋罷睇亞視,應該係一時衝動嘅說話,因為你諗極都諗唔起,有幾耐冇睇過呢個台,但最弊嘅係佢仲係我哋兩條免費電視頻道嘅其中一條。盧先亞

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載