› 選擇地區
三藩市
紐約
洛杉磯
其他美國地區
香港 台灣 北美
 
2012年09月10日

智取大市:行業勢頭好宏華咪走雞 - 晉佳

歐洲央行宣佈有條件下無限量買短期歐債,刺激環球股市上周五爆升,恒指周線圖變番陽燭,加埋成交配合,短線升勢未完,晉佳覺得大可以追貨,集中買有增長前景嘅股份,或者基本因素好轉嘅行業,前者有油氣服務及設備股,後者有汽車代理股。
油服股包括海油服務(2883)、安東油田(3337)及宏華集團(196)等。用最簡單方法解釋三者關係,海油服務喺油服行業中,就等於內房業嘅建築公司,安東有如裝修公司,宏華就係建築器材供應商。
較冷門嘅宏華,主要生產油氣勘探嘅鑽機同相關零部件,今年上半年業績相當唔錯,純利按年大增3倍至2.1億元(人民幣.下同),每股盈利6.53分,營業額升52%到19.69億元,毛利率由25.5%擴闊到37.6%。毛利升1.2倍,經營溢利升2.2倍,反映經營槓桿比較高,收入升少少,盈利升多多,有爆發力。
期內應收賬只較去年底升2%至15.94億元,存貨就升32%至20.37億元,至於應付賬竟然大升1.3倍至35億元,即係話宏華賒數多。喺咁嘅時勢,大家都話經濟唔好,驚借錢出去收唔番,供應商容許宏華賒數,證明兩樣嘢,第一,啲原材料唔賣畀佢,好難賣畀其他人;第二,信佢(至少係下半年)還款能力冇問題,生意亦比其他行業好。至於應收賬唔升,或者反映嚟緊定單仲未確認為收入,下半年可能會有頗大量嘅生意入賬,收入有條件大升。

生意轉旺 上望2元

事實係咪咁?睇佢股價年初升完唔跌,非常硬淨,似乎反映上述數字係好兆頭居多。下半年係油氣設備業旺季,存貨同應付賬增加係為生意舖路。睇嚟宏華下半年純利好大機會遠高於上半年,保守假設係上半年嘅1.5倍,今年市盈率只有6.8倍。
宏華1月至4月股價幾乎倍升,5月到9月中喺1.10元到1.40元之間上落,8月開始慢慢回升,8月27日業績前急升6.5%,8月28日放榜後即刻隊番落去,震倉完成,上周五曾經突破業績前高位1.34元,走勢幾靚,試完車嚟緊應該有唔錯嘅走勢,中線睇10倍市盈率,上望2元,明顯跌穿保歷加通道中軸1.20元就止蝕。

晉佳
本欄逢周一、三及五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載