› 選擇地區
三藩市
紐約
洛杉磯
其他美國地區
香港 台灣 北美
 
2012年09月10日

中環在線--最新風險因素:夫妻檔 - 李華華

財經新聞越來越有娛樂性,最近雅天妮(789)主席謝超群疑似患上精神病,又同一齊創立公司嘅老婆鬧離婚,老婆忽然變成話事人,立立亂咁,但小股東仍然未知發生乜事,唔知沽唔沽貨好。
照咁睇,以後新股上市,喺招股書上面,「夫妻檔」可能要列為風險因素之一,要搵麥玲玲或者蘇民峰同佢哋批命,睇吓離婚風險有幾高先至得!

主席離婚踢老婆出局

香港有好多家族持有嘅上市公司,「夫妻檔」亦唔少,多數係中小型上市公司,最經典係莎莎(178)主席郭少明兩公婆,兩人一齊搞莎莎,發達後依然出雙入對,一齊巡舖、入馬場,狀甚恩愛。
失敗例子係包浩斯(483),主席黃銳林同前妻唐書文創辦公司,09年公司突然話要開股東會踢走唐書文,大家先知道兩人原來已經離婚。
SOHO中國(410)主席潘石屹同行政總裁張欣兩公婆一直係上市公司「夫妻檔」代表,舊年底亦傳兩人鬧離婚。投資者投資一間上市公司,除咗睇業務發展前景同賺錢能力,亦好睇大股東同管理層穩唔穩定,以前好多人將「夫妻檔」等同穩陣、同心,不過家陣婚姻觀念越來越薄弱,統計處話,舊年本港離婚比率係3.8%,比五年前高0.5個百分點,即係100人有3.8人離婚,風水師自己識睇相都離婚再娶喇,投資者可能真係要對「夫妻檔」重新定義!

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載