› 選擇地區
三藩市
紐約
洛杉磯
其他美國地區
香港 台灣 北美
 
2012年09月13日

好不主席:虛應實無 - 盧先亞

「港人港地」政策絕對無助於用家買平樓。

有記者約做訪問,傾吓傾吓又講到去樓市,冇辦法,地產始終都係港人嘅常設話題。如果唔係梁班子亦毋須在就任後兩個多月,急於推出多項有關房屋的政策,當然爭取民心是一個原因,轉移視線,分散焦點又是另一理由。我自問非房產專家,公司亦沒有不務正業,冇涉足物業炒賣的本事,所以就樓市去向,政府出招的成效,我還是引述市場中人,現該說是政界中人的意見好了。行會其中一位大業主,素以房產投資眼光獨到見稱的林奮強,在思歪大吹大擂並親身指劃「港人港地」後說:「現時本港嘅置業者,少於一成係境外人士,佢哋未必會導致本港樓價上升,但港人心理上覺得有壓力。所以作為一個『急市民所急』嘅政府,推出『港人港地』係正確嘅做法。」言下之意就係相關政策只係徒有其表,因為境外,或者只係眾矢之的內地炒家,頂多就係火上添油,而唔係近年樓價飆升嘅罪魁禍首。咁「港人港地」到底有乜實際作為,林生當然點到即止,不過我另外識嗰啲地產界朋友就捂住嘴笑。皆因已經有啲,一就真係睇得唔通,二就根本打晒「籠通」嘅圍內人唱話啲港地會低市價三四成喎,目的不過就係先「壓價」,後「賺盡」。係就話「港地」買賣只限港人,但家陣莫講話以後,搵個有三粒星嘅內地移民新貴又有幾難?況且計正都仲有大把有實力嘅本地投資者擇肥而噬,只要稍有「樓」超所值,幾時會輪到最終用家買平樓?再者購入物業放租以賺取穩定租金收入者亦大有人在,業主就話要港人啫,租客身份既無限制,認租唔認人,若與同區樓相比,又點會有租金回報特高嘅筍盤,所以樓價咪又會追番晒!

房策國教何其相似

其實梁班子呢啲似是而非、甚或適得其反嘅膠招,港人早已領教。早前公佈有5000居屋白表免補地價嘅名額,就立竿見影,即時刺激居屋市場的交易,且同時創下港九兩地居屋呎價新高。而趁此千載機會套現嘅原居屋業主,當然會順勢向上流動,信心滿滿的準備做私樓業主,多一批準買家湧現,需求瞬間大於供應,私人物業市場又點會冇反應?自新政府上場至今,某項反映本港整體樓價走勢的城市領先指數,短短時間持續再升,且比97巔峯還要高出一成多,當初誠惶誠恐,生怕思歪會阻住發達嘅地產商,家陣定會如釋重負。在房屋政策上製造假供應、縱容真炒賣,同喺國教採取的假撤回、真實行的手段,何其相似,梁班子施政果然貫徹始終。盧先亞

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載