蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年09月16日
馬上成為壹會員

人生改變
婚後轉性買衫上淘寶

在訪問當日,Suki全套服裝的花費少於500元。

06年參加港姐落選後,事業路平平,徐淑敏卻覓得好老公,從屋村住進千萬豪宅。但婚後的Suki卻從大使妹變「度」師奶,連出騷的置裝費都大為「縮水」,當中少不了老公黃浩處處發功,為她惡補財智。

相關新聞:投資攻略儲定彈藥炒細價樓

昔日曾卡冚卡還債

「結婚係人生好大轉捩點」,她說,由於理財不善,過度消費,以前最惡劣時,試過在婚前負資產近50萬元,要靠卡冚卡度月。幸好適時「投資」到好老公,帶她走向一條光明路。「永遠要同銀行做好朋友,準時償還債務,建立良好嘅個人信譽好重要,現時可以問銀行借到錢做生意,呢個係一直佢灌輸嘅觀念。我家行出第一步,佢好安慰。」黃浩的精打細算確實見於細處。在商場消費滿特定金額通常可享受免費泊車,夫婦二人曾經就因錯過「吸車飛」而吵架,「佢覺得好唔抵,好介意浪費本應唔使畀嘅廿蚊。我以前無法理解,自己從來唔會咁做,作為藝人貪呢啲小便宜,走去吸車飛好肉酸。」直至後來她在書籍中了解到好多成功人士,都十分重視恰當運用一分一毫的價值,才對丈夫的做法心悅誠服。

買衫數百元封頂

Suki形容老公有固定的家庭消費模式,日常列好清單,何日何時用何張信用卡到何處消費。他記憶力驚人,知道如何善用各類信用卡,爭取享受到最大優惠。為達致精明消費的最大化,他同時擁有超過20張信用卡,「佢會幫我哋申請附屬卡,我都有10張信用卡,攞完着數就cut卡,等於銀行都係咁攞我哋着數。」受到丈夫耳濡目染,Suki走上慳師奶之路。她最近一年沉迷內地網上商場淘寶,「家買十件衫,十件都係購自淘寶,最平12蚊都買過!」以前為出騷置裝,全套衫經常要過萬,但現時基本上數百元封頂,效果一樣得到認同。「除咗鞋仍會選購品牌外,其他全部來自淘寶,但我近一年都冇買過正價大品牌嘅鞋,手袋基本係以前買落。呢啲係精明慳家,我唔介意人哋話我度,但對家人或朋友就絕對唔會吝嗇。」

相關新聞:出身基層發奮賺錢拒做少奶

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載