蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年09月21日
馬上成為壹會員

中門大開:東北事變 - 添馬男

不少市民反對新界東北發展計劃。

星期六新界東北發展諮詢會又爆大鑊,多得梁振英上場,人人攞住放大鏡去檢查政府所有施政,即使係前朝所訂,市民一樣唔信,通通再攞出來搵錯處。在前朝深港融合項目一直冇比主流傳媒質疑,如河套、前海發展、自由行擴大、跨界基建等。但一換上梁振英,市民就認為佢係共產黨傀儡,唔會將香港利益放在最先,只會配合中央執行「吞併」香港政治任務,如此一來,梁朝施政寸步難行。

前朝倡融合 主流冇質疑

2005年董下台,當時許仕仁回朝出任政務司,佢提出「邊緣化論」,認為香港要爭取融入內地,配合內地規劃,否則在全國發展中被邊緣化,失去競爭優勢。許仕仁邊緣化論成功扭轉香港人對融入內地嘅恐懼,打開曾蔭權年代「北進政策」大門,十大基建立即推出籌備上馬,即使面對80後反高鐵及大橋司法覆核,社會主流並未從根本否定融合。半年之內,點解會出現「被規劃、反融合、割地賣港」恐懼呢?此乃人心虛怯,梁振英權威失落所致。在3月選舉時,巿民對梁好感已逐步消失,到最後一星期主流認為應流選,但北京力捧梁上馬,種下禍根,更大鑊佢翌日立即去西環謝票,傀儡形象更深入民心。他重新起用羅范椒芬,力推架構重組,不但慘敗更令拉布三人組大受歡迎。

梁朝誠信低 巿民急反枱

市民對梁個人誠信、立場及能力都冇信任,傳媒則認為他太多偽術狡辯。一旦有些少風吹草動,巿民立即反枱,根本冇人願意聽佢解釋,好似國民教育政策因一本老左手冊而變成赤化洗腦恐懼,蔓延成佔領政總群眾運動。今次東北發展,亦因一國兩制研究中心不知名研究人員一段訪問,而變成「割地賣港」陰謀。地產商、鄉紳、本土保育社運、自治運動及非原居民正在集結,「謬波」得一招話起多啲公屋,以為咁就可以收買人心。佢可能唔知,今時今日,東北將成為本土意識及自治運動的新戰場,恐共防赤化,香港模式優先,反被規劃、保衞本土生活、反對政府收地模式全部炒埋一碟,以局長之低民望及低水平政治論述,佢可以擺平搞掂,就等如買加拉塔沙雷贏歐聯一樣。添馬男

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載