› 選擇地區
三藩市
紐約
洛杉磯
其他美國地區
香港 台灣 北美
 
2012年09月21日

好不主席:黑色旅警 - 盧先亞

九一八那天香港有多個團體分批到日本領事館示威,當中既有常客,如香港索償協會,亦有因利乘便嘅,譬如話白鴿友,不過佢哋竟然照抄「學潮」送上「誠實豆沙包」!先唔講嗰班真係老鴿,完全冇新意,往後都唔使旨意佢哋會搞得出乜新花款,再者將日本最強嘅文化輸出,呈送動漫(叮噹)裏面相關產品,咪即係予對方肯定,同助長人哋威風囉。

麥美娟爭表現變搞亂檔

不過點計都仲係唔及永遠緊隨中央調子嘅建制附庸有隊形,一呼百應,當中少不了有啲啱啱上位,要爭取表現嘅議員。其中候任嘅麥美娟就大義凜然指出,家陣旅日並不安全和不公義,因此呼籲政府應向日發出黑色旅遊警示。言論一出,當然馬上惹來網民大肆抨擊,之後連啲建制大佬都要急急出嚟劃清界線,十足十啲喺出邊亂咁「兇」人,搞到要搵人執手尾。其實旅遊警示呢個制度源於四年前,數以百計的香港居民因為當時泰國局勢急轉直下,被迫滯留曼谷。然後內地和其他受影響旅客的所屬國家都紛紛派出包機接載其國民離泰。惟獨我哋嘅保安局沉着應變,只作口頭支援,直至有港人夫婦在趕赴機場離泰途中發生交通意外,港府先至匆匆安排包機,不過官員在這事件上的遲鈍反應和失措舉止,又一次看在市民眼裏。之後差唔多一年先正式設立「外遊警示制度」。首次直接獲發黑色警示的地區是菲律賓,起因就是導致八名港人喪生的馬尼拉警員脅持香港旅行團事件。事隔兩年,還有很多人仍活在這慘劇的陰影當中,對其他港人來說,也確實是一段叫人悲慟的記憶。不過時至今日,菲國仲係位列黑名單之一(另外全球亦只有暴力衝突嚴重嘅敍利亞能得此「殊榮」),此事卻值得深思。冇錯,營救的菲警都似酒囊飯袋;相關官員亦庸碌無能,只會推卸責任;個總統更加係皮笑肉不笑,惹人討厭,而到現在菲政府還是欠了港人一個交代和死傷者一個公道。但呢啲同旅遊警示有乜關係呢?

制度服務政治 中共思維

警示係基於一個國家或地區會出現風險的性質、程度和持續性作出分析,所以遇有天災威脅,如水災、地震、颱風,或者人禍,如示威騷亂、各類型襲擊等,旅客自當要提高警戒,免得身陷險境。但若然只不過係對方好乞我哋憎,同埋佢啲人好冇「品」,執法機關就要投我們所好,張「黑牌」高舉不下,咁我哋一直秉持嘅文明處事,尊重程序嘅精神,又去咗邊呢?所以咪有嗰位候任嘅麥議員咁,以為政府機關、人員和制度都只係為「政治」服務。呢啲思維典型就係中共那一套,完全沒有顧及法理和程序的考慮,不過從佢呢點嘅水平,足證她果然是阿爺的乖孩子和好學生,能夠成為工聯新星豈會無因。現剛出場,初試啼聲已一鳴驚人,往後荒腔走板的膠樣表現,真的引頸以待,麥議員,你都要「搓揉Best 呀」!盧先亞

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載