› 選擇地區
三藩市
紐約
洛杉磯
其他美國地區
香港 台灣 北美
 
2012年10月11日

六福營業額跌逾30%
珠寶生意縮水 龍頭股齊衰

【本報訊】訪港內地豪客不再,珠寶首飾股黃金周表現「齊齊衰」。股價連跌六日的六福(590),其董事兼財務總監羅添福表示,集團期間香港業務同店營業額跌幅超過30%!有外資分析員相信,其他龍頭珠寶股都「唔慌好得去邊」。 
記者:陳健文、吳綺慧

相關新聞:風光不再珠寶股市值蒸發500億

於過去六日股價累計跌約20%的六福,昨日證券界流傳,其香港業務黃金周銷售表現非常不濟。本報就相關消息致電羅添福,他大方承認集團黃金周銷售表現欠佳,主因是訪港旅客消費金額減少,及往年比較基數太高。

自由行效應陸續減退

羅添福說:「我哋香港業務黃金周期間嘅同店營業額,按年跌咗超過30%,聽落好似好恐怖,但你要記得,舊年因為日本天災,令到多咗旅客嚟香港,個陣個金價又咁啱跌一跌,導致到舊年嘅同店營業額,錄得破天荒嘅65%增長。」
他續稱:「家無論係黃金周定係平時嘅日子,香港自由行效應減退係不爭嘅事實,大家要接受呢個回歸正常嘅情況,就算第時回復增長,行業經過咗呢幾年嘅急速開舖,成個珠寶首飾板塊每年嘅增長速度,應該只會得返單位數字。」

周大福:大價單數目減

本報昨日亦就黃金周銷情向本港最大珠寶零售企業周大福(1929)查詢,其發言人表示,由於集團即將公佈業績,故現時不便披露相關數據,惟承認黃金周期間顧客單價大部份集中在1至5萬元,10萬元以上的單價交易則有所減少。
至於另外兩家珠寶零售界龍頭周生生(116)及英皇鐘錶珠寶(887),據建銀國際的研究報告指,周生生於黃金周期間的同店營業額錄得倒退,黃金與珠寶產品銷情均表現疲弱;英皇鐘錶整個第三季度及黃金周期間同店營業額,均錄得低單位數字倒退,預期全年營業額亦只能表現持平。
此外,有外資分析員表示,由於近期市況真的非常差,早已預料黃金周「無料到」,但估不到可以這樣不濟。他表示:「好似六福咁,條街原本已經估會跌20%,估唔到家埋單跌咁多,只可以講,經過咗咁多年,內地旅客已經識得唔好迫埋一個假期嚟香港,打散12個月咁嚟買嘢。」

市況不濟 舖租仍企硬

他續稱:「之前公佈話黃金周有增長嘅莎莎(178),若果你細心睇下,查實佢個增幅仲細過平時㗎!所以話家啲黃金周一啲都唔黃金!所以就算今年條數咁差,我都唔係睇得咁淡,主要原因係近排金價升返,呢個因素對大陸消費者好緊要,另外就係舊年個市係喺第四季開始唔得,即係個比較基數相對較低,咁今年個sales咪相對有得升囉。」
香港零售市場欠佳,會否令租金回落?有市場人指,短期看不到這個可能,他說:「咁多國際品牌話要進軍香港,今年旺區商舖租金唔會跌。就算生意差,零售商都要繼續捱貴租,會影響毛利率。」

黃金周檔期珠寶股香港業務表現

【六福(590)】 同店營業額錄得超過30%倒退
【周生生(116)】 同店營業額錄得倒退
【周大福(1929)】 沒有披露具體數據,惟單價有所下跌
【英皇鐘錶珠寶(887)】 同店營業額錄得低單位數字倒退
【亨得利(3389)】 沒有披露具體數據,惟見到消費情況有改善

資料來源:公司及建銀國際研究報告

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載