› 選擇地區
三藩市
紐約
洛杉磯
其他美國地區
香港 台灣 北美
 
2012年10月13日

高層又跳船李寧竟彈起
料憧憬TPG鞏固控權

李寧首席財務官鍾奕祺(右)辭職,市場反應正面。左為公司主席李寧。資料圖片

【本報訊】繼行政總裁張志勇於7月辭職後,李寧(2331)再有高層「劈炮」,今次輪到「睇數」的首席財務官鍾奕祺,昨突宣佈將在下月離職。李寧執董兼執行副主席金珍君於電話會議強調,董事局與鍾氏並無分歧。
記者:陳健文

李寧是在昨日早上刊發鍾奕祺離職的通告,並在8時半召開投資者電話會議。據有份參與會議的外資基金經理表示,會議只是進行了30分鐘,一開始已「講明」不會回答集團營運及財務問題,就鍾奕祺離職,亦只是重覆通告內容,完全「冇料到」。

投資者會議冇料到

該基金經理說:「噚日一開始,執行主席李寧就講咗堆開場白,之後就由身兼基金TPG合夥人嘅金珍君主持會議,鍾奕祺都有講嘢,但唔多……金生講嚟講去,咪都係讀番張通告嘅內容,連嗰位過嚟幫手、話有20年經驗嘅顧問,到底做過乜嘢公司都無講,但咁嘅會議居然都要搞成半粒鐘。早知係咁,食耐啲早餐好過。」另一名因預期會議「冇料到」而無參與的分析員指,可視鍾奕祺離職為中性偏好的消息。他說:「第一,鍾奕祺係張志勇請嘅,市場早已預咗鍾氏一定會走,只係時間問題;第二,鍾奕祺只係一個恰如其份嘅CFO,李寧依家最需要嘅,係一啲可以拯救到公司嘅人;第三,今次事件顯示TPG嘅控制程度正在上升緊,對改革嚟講係一件好事。」李寧通告指,於09年加入集團的鍾奕祺因為其他事業發展追求,已辭任集團執行董事兼首席財務官職務,由11月1日生效,其後他會出任集團顧問,集團現時亦正與新首席財務官進行磋商。公告指,於過渡期間,一名具有逾20年營運經驗、曾做過跨國企業中國區首席財務官的顧問,將協助領導集團的財務職能。

帶動運動股上升

另外,集團亦宣佈,李紅已辭任公司秘書,由10月15日起生效,確認與董事會並無意見分歧,她同樣會擔任集團顧問,其職位將由嚴慧燕接任。受TPG控制權進一步鞏固的消息刺激,李寧股價昨日曾一度升近8%,最後收報4.83元,升3.4%或0.16元,更刺激到其他運動股上升,如安踏(2020)升4.79%至6.78元,中國動向(3818)亦升3.53%至0.88元。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載