› 選擇地區
三藩市
紐約
洛杉磯
其他美國地區
香港 台灣 北美
 
2012年10月16日

中環在線:志雲大師開刀滅火 - 李華華

志雲大師今年初入主商台後,不斷改革節目,先向娛樂節目埋手,小欣姐都係因為咁走咗去無綫,新近輪到881嘅財經節目,兩位「燈神」孫柏文同火燎森逢周一至五(周三跑馬除外)晚上10點半至11點嘅《星火燎原》,做埋呢個星期五就摺,下周一改由歌手葉宇澄主持音樂節目。

《星火燎原》得番三日命

商台決定摺埋節目,理由好簡單,咪就係個節目搵唔到廣告囉。孫柏文講,志雲大師上星期尾叫咗佢兩位入房,指商台有太多財經節目,晚上10點半呢個時段又好寶貴,搵唔到廣告就要作出調整。
據講《星火燎原》摺埋嘅另一個原因係「骷髏會」唔夠人氣。商台09年搵孫柏文、火燎森一班人搞免費財經社交平台骷髏會,衍生《星火燎原》呢個節目,三年過去,骷髏會越來越冇聲氣,加上港股持續淡靜,輪商一早抽晒啲廣告,少咗呢班大客仔,又冇其他金融機構肯「夜麻麻」落廣告,咁就要摺嘞。
火燎森對於冇咗個節目好似冇乜所謂,話多啲時間做其他嘢,之後會專心搞網上生意咁話。
至於商台另一位財經節目主持人陳永陸就定過抬油,佢噚日氣定神閒咁話,《星火燎原》摺埋對佢冇影響,「夜晚個節目收聽率低,但晏晝節目唔係喎。」最重要都係睇有冇廣告客戶支持,佢個節目搵到唔少廣告,志雲大師又點捨得摺埋佢吖!

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載