› 選擇地區
三藩市
紐約
洛杉磯
其他美國地區
香港 台灣 北美
 
2012年10月16日

中環在線:羅兵咸逼員工放冇薪假 - 李華華

羅兵咸今次做先鋒,率先叫員工放冇薪假,其餘三大應該陸續有嚟。

四大會計師行上月底先向員工宣佈來年(通常10月開始新一個年度)加薪幅度,點知轉頭即刻傳出羅兵咸永道要求員工放冇薪假嘅消息。

生意淡薄 藉口一大籮

聽聞四大之一嘅羅兵咸永道近日發出通知,要求所有員工喺明年4月前,放12日冇薪假,但唔係完全冇薪,好似話會出番當中三分一嘅人工。叫人放假嘅原因都係全球經濟差,加上美國總統選舉臨近,多咗不明朗因素云云,總之都係生意淡薄啦。
四大另外三間會計師行暫時未有類似舉動,但大家已經有晒心理準備,有partner講明,如果生意繼續差落去,都可能要求員工放冇薪假,減輕吓成本壓力,叫人放冇薪假總好過裁員咁大件事。
查實上月底四大宣佈來年加薪幅度時,華華都叫咗大家唔好咁快開心住,會計、核數師因為按年升職,所以實有人工加,爭在加多加少。今年以來,生意唔好,四大一直靜雞雞請人走,唔叫做「裁員」。四大一班partner已經預咗來年經濟同生意唔好得去邊,進一步削減成本係預料中事。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載