› 選擇地區
三藩市
紐約
洛杉磯
其他美國地區
香港 台灣 北美
 
2012年10月16日

中門大開:紅色Smart Ass - 添馬男

內地曾有媒體竄改保釣人士登島插旗一相。 互聯網

昨日有單小新聞,睇完覺得心驚,香港為何會變成咁。
話說有人發現童軍月刊內刊登香港與台灣童軍交流活動圖片,相中台灣童軍制服上的青天白日滿地紅旗章,被人用電腦改圖方式模糊化,於是向香港童軍總會抗議。香港大陸化程度,已經同內地有媒體竄改保釣人士登島插旗一樣,匪夷所思。

青天白日旗模糊化

對內地新聞處理而言,青天白日旗並不敏感,只是內地有媒體自以為政治敏感度高,政治正確先行,才塗抹青天白日旗。童軍總會內負責月刊的人,也自以為醒目Smart Ass,自我政治審查,將襟章模糊化,呢啲叫做皇帝未急太監急。
香港國教風波後,最令人擔憂正是呢種Smart Ass香港人,為求政治正確而作自我審查。大家千祈唔好以為老師、校長及辦學團體個個有腰骨、有信念,不少是見風駛,睇住教育局指揮棒辦事,慌死執輸。
朋友係教書先生,佢話未有國教風波前,學校已刮起一股愛國風,包括比拼升旗禮,有咁浮誇得咁浮誇,出動制服團隊步操,似足天安門廣場儀式。
另外不斷催谷學生參加愛國交流團,其實將國教列入課程已係最後一步,即係話之前已經做咗好多步。國民身份認同原則上冇大爭議,大家擔心國民教育變質成為愛國愛黨的黨化教育,而從過去所滲入學校的活動所見,不少香港紅色Smart Ass,表面係搞青少年活動、搞社區活動、搞文化活動、搞交流活動,背後其實從政府各項Funding中分一杯羹,實質係搞愛國愛黨教育。新任考評局主席陳仲尼、專搞青少年活動的陳振彬,便是表表者。
搞國教唔單止有水,仲可以有功勞,要走建制路線之蠱惑仔眾多,自然人人奮勇、個個爭先,童軍月刊改圖事件,只係冰山一角。
添馬男

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載