› 選擇地區
三藩市
紐約
洛杉磯
其他美國地區
香港 台灣 北美
 
2012年10月16日

好不主席:說謊小孩 - 盧先亞

不記得是那個哲人曾經說過:「這個世界不過是由謊言推砌出的現實。」對照政府新任班子的施政作風,我敢說他們每個都具備成為大哲人的條件。其實身為政治任命官員,即可歸為「政客」一類,職業又或職責所需,又點可能句句屬實,不打誑語呢?當然「誠信」係好重要,但同時間,一般民眾可能更加關心嘅係為政者能否好好處理危機,爆咗鑊(多數係自己嗰隻)之後點樣收科。乜嘢時候要坦白交代,有錯要認;幾時自動負荊請罪,打要企定,一切在於如何拿揑「時機(Timing)」和「分寸」。好多時候,第一個謊言都會情有可原,但係俾人揭穿咗,還心存僥倖,諗住用其他「大話」掩飾謊言,咁先係死不足惜。

自作聰明講大話 內疚都慳番

當然仍有人會認為咁點解唔一開始就老老實實,咁我會話,我淨係識有位董生係一個咁嘅人,佢真係有嗰句就講嗰句,連「八萬五」無端白事冇咗都可以就咁坦然相告,你就知佢份人係點。我相信為人父母師長都會教導啲細路要做個誠實嘅人,唔好講大話,由此可見董生細個嗰陣,一定亦係一個聽教聽話嘅乖小朋友,不過問題可能出現喺智力發展上。
因為心理學家經過唔少實驗後證實,一般3歲以下嘅小孩大多數唔識講大話,我應該都係,因為按照我阿媽嘅說法,我3歲連嘢都未識講,莫講話說謊,嗰陣屋企人爭啲以為我係啞嘅。跟住啲細路要到3歲幾至4歲先會察覺到講大話嘅好處,譬如話做錯咗嘢可以免於受罰,如果冇人知嘅話。
所以根據啲專家所講,若然閣下發現你的子女3歲之前已經懂得說謊,你應該高興得很,因為佢起碼比其他小孩早熟。當然你又唔使刻意向其他父母炫耀,雖然亦知你好難按捺得住,呢啲比起會「飛吻」已經要巡迴表演,層次實在高好多。反之,如果你嘅子女到咗4歲都仲係唔識得講大話,又鍾意食誠實豆沙包,咁你可能要擔心係咪佢細個嗰陣冇用嗰隻增強BB腦部發展嘅奶粉。
但父母又毋須太擔心,畢竟你個仔未必有董生咁難得嘅天資,所以終歸佢都會懂得說謊,同埋學以致用,因為呢啲幾乎係佢哋,仲有我哋成長嘅必經之路,你唔通又想話我知,你從來都唔講大話?又係嗰啲心理學家出嚟證明,成年人每日都一定會說謊,包括有啲所謂嘅白色或善意謊言、半真半假、適度剪接的話語。而不笨的小孩亦會清楚明白,成年人不過是說一套,做一套,口裏說話強調誠實,但自己咪又係成日都唔眨眼。面對呢啲寬己律人嘅雙重標準,細路自不然就會「有樣學樣」,咁又怪得了誰?
再者小孩子既然同啲成年人一樣,每日都少不免講大話,佢哋亦會開始去諗,以後應該喺做錯嘢嗰陣撒謊以脫身,定係認錯求恕。對大部份仍有良知嘅人而言,講大話點都會有內疚,不過早早自首又可能要受靶。所以自以為聰明嘅人,就會千方百計瞞天過海,甚至連自己都呃埋,「唔記得、唔清楚、唔知道」曾經說謊,咁就連丁點「內疚」都可以慳番!
盧先亞

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載