蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年10月24日
馬上成為壹會員

智取大市:現金牛雅士利抵到爛 - 晉佳

港股出現基金追貨潮,二、三線股炒到飛起,相信港股一日唔大回,炒風都好難停,可以繼續尋寶。早兩個月晉佳推介過雅士利(1230),事隔兩個月,股價已經突破埋形成超過一年嘅雙底頸線阻力1.50元,係中長線強烈利好訊號,亦形成咗晉佳當初所講嘅中線買入條件,呢種技術形態冇量度升幅可言,可以升到你估唔到。嚟緊股價大漲小回之下,博佢炒上2.50元,難度唔大,值得買入。
比較晉佳兩個月前寫雅士利嘅時候,佢嘅業務表現又出現咗進展。根據市場調查機構AC Nielsen前排嘅數據,以銷量計算,雅士利喺2012上半年嘅國產嬰兒奶粉內地市佔率,由6.5%升到7.8%,而8月份更加上升到8.7%,重返頭三位。
雅士利上半年全脂奶粉採購成本下降13%,至每噸3500美元,令上半年毛利率提升2個百分點。由於原奶採購落單直到運貨需時半年,有券商已經大概估到,今年下半年全脂奶粉成本跌到去3000美元,毛利率有條件再升1至2個百分點。市佔率上升,毛利率又應該可以上升,雅士利下半年業績應相當見得人,華泰金融估計,雅士利全年每股盈利14分人民幣,其中下半年每股盈利預測更達到7.8分人民幣,即係預測市盈率跌到去10倍左右。
為咗令內地人對雅士利產品有信心,雅士利管理層講明,唔會喺內地開發上游業務,相反會喺海外尋求機會。如果雅士利可以學合生元(1112)咁,開發到假洋奶產品系列,嚟緊可以打埋中高端市場,長遠增長就更加唔簡單。

下半年業績見得人

此外,雅士利有多一項好處,就係現金非常多,今年6月底淨現金15.4億元人民幣,7月底又有3.49億元人民幣嘅理財產品資金回籠,賺2.7厘至6厘利息,其餘8億元人民幣嘅理財產品投資會喺一年內回籠,現金加上理財產品價值,已經達到市值55%,當中仲未計經營現金流,以過去半年2.18億元人民幣計算,未來一年應該超過4億元人民幣。你用周一收市價1.70元買入雅士利,當中有差唔多1蚊係現金,買入間公司業務只係7毫幾子,仲要每年經營現金流超過每股1毫子返嚟,所以呢隻低殘Cash Cow實在抵到爛。

晉佳
本欄逢周一、三及五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載