› 選擇地區
三藩市
紐約
洛杉磯
其他美國地區
香港 台灣 北美
 
2012年10月24日

中環在線:年尾趕交差 董事再培訓 - 李華華

最近同幾位來自不同上市公司嘅董事食晏,問佢哋忙緊乜,佢哋不約而同話,忙住做training,事關港交所(388)今年4月1號開始,要求所有上市公司董事參與「持續專業發展」培訓,冇做就要喺年報內嘅企業管治報告解釋,臨近12月底年結,好多董事趕住做training交差囉。
港交所前年就企業管治守則進行市場諮詢,其中一項,建議上市公司董事每年接受八粒鐘培訓,咁咪即係要求84歲嘅長和系主席李嘉誠做培訓?好話唔好聽,超人食鹽多過你港交所行政總裁李小加食米,叫李超人做培訓簡直天方夜譚,梗係搞到大把人反對啦。
港交所應該係吸取董事禁售期一役嘅教訓,從善如流,最後冇限定培訓時數,培訓方式亦由董事自己決定,但董事要向上市公司提供做training嘅紀錄,上市公司要喺企業管治報告講番董事做咗乜嘢培訓,冇做就要解釋原因。

上堂又得補習亦得

於是乎,一眾董事真係各適其適咁做training,有啲本身係律師、會計師嘅獨董,就走去會計師行搞嘅講座,坐兩、三粒鐘上堂,聽吓金融市場、會計準則有乜新發展需要留意。
部份執董日常事務太忙,行唔開,就請位律師上公司,單對單傾一、兩粒鐘,聽聽《上市規則》有乜嘢更新,免得誤踩地雷,律師鐘錢當然係上市公司畀啦。估計李超人都係要求上門私人培訓居多,唔知李小加自己又培訓咗未呢?!

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載