› 選擇地區
三藩市
紐約
洛杉磯
其他美國地區
香港 台灣 北美
 
2012年10月27日

樓民講場:平台樓 激到嘔

我諗極都唔明,點解連平台的單位會貴過普通分層戶?「特色戶」真好聽,但唔住過,都唔知箇中之苦。小弟屋企人的單位正是有個平台,係多咗地方用,可惜香港人家冇晒公德心,我哋日日都要掃垃圾,廚餘、M巾、安全套樣樣齊,有次仲成個花盆跌落嚟!屋企人報埋警,但根本拉唔到人,惟有日日提心吊膽過日子,希望呢位鄰居只係一時錯手吧!間唔中就會有「空中飛人」跌落平台的新聞見報,真係令人為這些不幸業主傷心。一場街坊,無仇無怨,搵啲咁嘢搞,業主無端端有經濟損失已夠慘,仲隨時嚇親家中老少,好無陰功。早前我跟朋友去到藍田睇樓,見到個放盤連平台,業主好好心機整到好有戶外餐室feel,睇到我哋為之心動,但返到屋企諗清諗楚,我接受唔到一邊進食一邊擔心「中頭獎」的壓力,將平台封頂又可能遇到管理公司的法律行動對付,所以都係決定放棄。屋企人住平台的遭遇,已令我患上平台驚恐症,若想要戶外空間,我寧願勒緊褲頭省多點首期、忍受炎夏似焗爐的天台戶,都唔想承受「唔知幾時」的飛來橫禍。讀者 李細蚊本欄園地公開,歡迎各界來信,以450字為限,請電郵至mailto:Business@appledaily.com,註明《家》樓民講場,請留聯絡電話。編輯保留文章的刪減權。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載