› 選擇地區
三藩市
紐約
洛杉磯
其他美國地區
香港 台灣 北美
 
2012年11月14日

中門大開:藉口 - 添馬男

新政府之亂局,究竟誰應負上最大政治責任?

家做官真係happy,凡係做衰咗,都有標準答案解釋,就係因為「市民信唔過CY」,以為佢係共產黨員、中央傀儡。但大家千祈咪有樣學樣,你試吓做Sales今個月唔到數,阿頭發難,你氣定神閒同阿頭解釋,最衰係市民唔信公司,你估有乜下場?即炒。

新政府欠章法 先急後亂

我一直認為巿民信唔過CY,係庸官失誤之藉口,借勢將所有錯誤推畀佢,有大食大。如果你話因為佢係黨員而質疑,咁立法會主席曾鈺成仲大鑊,民望理應低過「鼠王芬」、「元秋」及「Dr.Tree Gun」。大家細心諗諗,如果CY係原罪,應該所有司局長一齊攬住死,點解新人高永文一個彈出。高永文同「謬波」、「吳得掂」及「星爺」最大分別係「身段」夠軟,肯認低威。被爆僭建,立即多次公開耍冧,至少唔乞人憎,唔去拗花槽定花棚,唔會發晦氣,似番一個正常人。至於其他施政失誤,乃源於處事粗疏,急於求成,以致思慮不周。以啟德爭議為例,體育界乃建制中人,要滅城,一般做法乃先同民政局傾妥,再由民政局出面摸底,而且有替補方案,仲每年增加撥款作利誘體育界。一切低調保密進行,絕對冇可能打開口牌,在出面造勢放風,意圖製造民意逼體育界就範,此種手法極之不專業,難怪民政事務局局長曾德成要拍枱大罵林鄭反撲。同樣長者生活津貼,以張建宗老狐狸性格,應知道同工聯會交手,大家傾清楚雙方底線,過去絕冇可能搞到公開火併。如果政府高層一早定下立場無退路,便要由林鄭出面知會鄭耀棠,大家夾好台詞劇本先上場。今屆之亂局,是新政府對政治認識及意識出了偏差,首先冇好好總結上屆的好與壞,吸取曾蔭權管治經驗,其次係施政欠章法,先急而後亂。負最大政治責任者,大家認為是政務司司長管理無方,定係特首疑似黨員傀儡?添馬男

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載