蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年11月16日

邢李㷧掃思捷「尷尬日」披露
柯清輝:公佈前唔知

【本報訊】思捷(330)前主席邢李㷧上周五「掃入」思捷,惟要到前日、即供股權最後一個交易日,聯交所網頁才披露,惹來市場揣測,消息刺激其股價昨最多曾升逾32%。邢李㷧好友兼思捷主席的柯清輝昨回應,指「佢幾時成為思捷嘅股東,佢公佈前我唔知㗎!」
記者:陳健文、陳新政

相關新聞:全線瘋炒股價漲22% Call輪升4倍

柯清輝昨日在臨時召開的記者會上,「劈頭」第一句便說:「基金沽貨同邢生入股絕對唔係計劃,我諗如果啲人見邢生入股,都冇人想賣啦!」強調邢李㷧只是投資者,建議記者自己找他回應,指「佢今次投資動機,都係最好直接問佢。」

直認好友關係 間中取經

對於與邢李㷧的好友關係,及曾跟邢氏談論過思捷,柯清輝直認不諱。
他說:「我同佢係好朋友,一路以來成日都有見面,咁你話有冇同佢傾過思捷嘅嘢,實有啦!我做咗主席,有時都問佢取經,攞下意見!」
他續稱:「我同邢生成日都有接觸,無論打波、食飯、出埠,但佢幾時成為思捷嘅股東,我都唔知,或者佢嗰陣時有冇賣晒啲股票,我都唔知嘅……(對上一次接觸邢李㷧)冇辦法記到,話晒我年紀咁大,前日幾時講過嘢,我都未必記得,如果證監問我,我都要摷番diary先答到!」
柯清輝又說:「邢生作為potential(潛力)嘅投資者,管理層都有同佢碰過面,但佢幾時買股票,公司係睇到張DI form(權益披露表)至知佢買咗幾多股票……我幾時都歡迎任何人買思捷,至於邢生入股對公司係咪正面呢,我就唔評論。」
本報曾就邢李㷧持有思捷股份的資訊,為何要到周三才「曝光」向聯交所查詢。
聯交所發言人指,邢李㷧是在12日、即本周一晚向聯交所遞交,惟由於時間關係,未能即時處理,到周二處理相關申報時,發現漏報了部份資訊需補回,故最後令邢李㷧持有思捷股份的資訊,要到周三、即供股權最後一個交易日才能披露。

相關新聞:樂香園:邢李㷧同思捷講「心」?

供股權最後一日披露持股

本報翻查聯交所網頁,確實清楚寫明邢李㷧是在12日送交相關的存檔。而本報亦曾就相關事宜向證監查詢,不過,發言人指不評論個別事件。
另一方面,對於市場憧憬有份帶領思捷走上高峯的邢李㷧「回歸」,有助思捷渡過難關。柯清輝表示:「我哋暫時未聽見佢有意願入董事局,如果佢有呢個意願的話,董事局會作出考慮……邢生都認為思捷係要作出改革,如果行返舊嗰條路呢,即係冇出路,思捷嘅改革係必要嘅!」
柯清輝續表示:「我同鄧生(集團財務總裁鄧永鏞)成日都有接觸(邢李㷧),但我唔會主動搵佢,因為我對佢了解太深,有知道佢嘅脾性,如果我作出主動要求嘅話,對佢會有難處。我會被動,如果佢向我主動提出加入,我先會將佢嘅意見交入董事會,作出討論。」

【網民洗版】邢生有錢輸得起

Nyny Jj:去一齊遊船河咁多次……唔通傾游水技術!?

蘑菇飯糰:爛船三斤釘,雖然應該唔會升返$117,但𠲖家成日$9至$12個價上落,賺吓零用都ok

派膠皇后:咁樣回購法得一個原因,就係佢知這公司價值遠遠大過市值

BigJerKing:過三個星期咪跌返落10蚊

迷失追渣沽:邢生有錢輸得起,小股民唔好衝入去送死

牛腩河達人:唔好掂,一條友咁醒,高位走晒貨,冇咩理由會咁儍的嗎,破晒底接番,條友一定係象徵式,有動機,而非睇到復蘇

資料來源:蘋果日報facebook /高登討論區

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載