› 選擇地區
三藩市
紐約
洛杉磯
其他美國地區
香港 台灣 北美
 
2012年11月26日

智取大市:買南航炒復蘇概念 - 晉佳

晉佳近期留意航空股,原因有幾個,第一,航空股絕對緊貼內地經濟周期表現,如果市場炒作內地經濟復蘇,一定唔少得呢瓣;第二,中央未來要大力收窄貧富懸殊,搭飛機對內地人嚟講,長遠會由中高檔消費變為中低檔消費,航空客貨運都會係受惠行業,中長線前景唔太曳;第三,航空股走勢落後於其他板塊,未來追落後空間大。

香港上市嘅航空股有國泰(293)、國航(753)、東航(670)同南航(1055),論內地航線比重,最高係南航,最低係國泰。你睇呢批股份嘅表現,好明顯年初至今國泰走勢勝一籌,南航就最差。估值方面,上述4隻股份嘅市賬率分別係0.98倍、1.17倍、1.23倍同0.86倍,南航亦係當中最低。如果博政策受惠加上經濟反彈,揀股方面,南航應該係最值博,因為內地航線比重較高,受惠內地經濟復蘇程度,係航空股之中最大。

現價買 短線睇3.9元

十年八年之前,從基本因素出發,要買航空股只能買國泰,因為南航同東航都唔係好識賺錢,完全靠人民幣升值帶嚟嘅滙兌收益頂住盤數,但今時今日盈利能力已經大有改善,就算喺今年上半年人民幣相對貶值嘅日子,仍然保持盈利,基本因素明顯提升。
睇番今年上半年,人民幣貶值令南航出現滙兌虧損3.14億元人民幣,加上收入增加13%,低過成本嘅16%升幅,令盈利減少85%到4.24億元人民幣。

不過,第三季人民幣開始回升,單季盈利又跳升到22.16億元人民幣,頭第3季每股盈利27分。喺美國無限QE加上熱錢流入中國之下,人民幣持續升值機會增加,對南航有利。
南航長期保持盈利,但係市賬率低於1倍,估值算偏低。睇番南航股價喺3.20元以上有強大承接力,年初至今一直跌唔穿呢個位,現價買都幾穩陣,可以趁最近股價開始回升買入持有,短線上望3.90元,中線突破4元阻力問題不大,睇4.50元,跌穿3.20元先打靶。

晉佳
本欄逢周一、三及五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載