蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年12月16日

周日人物:
為老品牌度橋 宣傳玩出新意
謝瑞麟陳立業 肩負翻生使命

陳立業表示,加入謝瑞麟兩年以來,首要提升公司服務水平。梁志永攝

曾經以不足30之齡成為最年輕總經理的陳立業,被外界稱為「橋王」。近年他加入謝瑞麟(417),協助這間老牌公司重新上路,銳意為傳統珠寶業搞搞新意思,如免費幫客人度橋求婚,提供百萬元珠寶租借等,全為「做口碑」。陳立業認為其「代表作」至今尚未出現,「希望在我走之前,可以幫公司建立品牌,而唔係只做一間珠寶舖!」記者:吳綺慧

相關新聞:周日人物:「盼做全職福音歌手」

當年在香港電訊成功創立「one2free」、「1010」品牌打響名堂,在旅發局推出「Q嘜」優質旅遊服務計劃,亦贏得掌聲。不過現為謝瑞麟首席營運總監的陳立業,卻從不喜歡被別人稱他「橋王」,「我覺得好尷尬,人哋咁叫我,我都唔知點回應好。」
陳立業做過電訊公司、旅發局、銀行,到現在賣珠寶,每一個行業似乎都毫無關連,但他卻希望把自己定位為「管理通才」,從每個行業中找出做生意的共同原理,「我以前在香港電訊,張永霖(當時的行政總裁)每晚都要打電話問我賣咗幾多部手機;到賣得出手機,又要諗點令個客上台,谷佢用多啲分鐘。其實邊度做生意嘅原則都一樣,首先要吸引個客肯行入嚟買嘢,然後你有乜add value(附加價值)畀人,先可以令佢變成你長期客仔。」

幫客度橋求婚 借戴貴珠寶

陳立業表示,加入謝瑞麟兩年多以來,首要任務就是提升公司產品、服務水平,「度橋」讓分店的夥計們可以發揮,「你叫佢服務好啲,咁具體要點做好?你要諗啲『工具』畀佢哋用先得。」
謝瑞麟去年開始,在中、港兩地分店訓練了一班婚嫁大使,除了向顧客提供婚嫁貼士,只要客人在謝瑞麟買求婚戒指,婚嫁大使甚至可以幫準新郎度橋諗計,協助他求婚成功,費用全免。
「香港人好似比較怕醜,但呢個服務喺內地好受歡迎。我哋北京同事就做過一個case,男友帶女友來我哋舖頭,聲稱話揀禮物,其間男友謊稱肚痛要去洗手間,其實係走去換咗件熊bear bear裝,再拎住預先買定嘅戒指跪地求婚。」陳立業指出,就算在青島等二線城市,客人都喜歡搞搞新意思,如在商場內掛大banner求婚,轟動到第二日上報紙。

相關新聞:周日人物:買ELN輸鑊甘 投資轉趨保守

這數年來,「橋王」不斷諗新計,進一步突出公司服務,「我哋唔做有人做過嘅嘢,引入iPad銷售、全線分店裝Wifi、同時裝品牌crossover上紐約天橋行show,都係我哋第一個做。近排我哋喺內地推出百萬珠寶借戴服務,畀客人借珠寶出外影婚紗相。」
陳立業形容,謝瑞麟現時在產品及服務定位上,都已經達一定水平,下一步就是要重新宣傳推廣,告訴顧客沉寂多年的謝瑞麟「已經返咗嚟」。「我哋差不多20年無拍過電視廣告喇!真係好耐,家係時候話俾消費者聽『We are back』,將我哋之前鋪排咗咁耐嘅創意,轉化成實實在在嘅生意。」

品牌最值錢 做得好賣貴啲

陳立業說,他在謝瑞麟的「代表作」尚未出現,每次仍期待「下一條橋正過上一條」。長遠而言,他希望幫助謝瑞麟成為一個真正的品牌,而非只是一間珠寶金行。「我哋唔要齋做channel(銷售渠道),最值錢係做品牌,要做到一件產品加咗謝瑞麟個chop,就可以賣貴啲。」
不過他笑言,自己已經「時間不多」,「我已經同Annie(謝瑞麟主席謝邱安儀)講咗,我50歲就要退休㗎喇!即係仲有三年。到時搞掂晒我就會唔撈,全職投入理想,去做福音歌手。」

陳立業小檔案

1986年  畢業於加拿大多倫多大學
1990至1999年  回港後任職香港電訊,曾為公司最年輕總經理,創立1010及one2free品牌
1999年  出任花旗(時為萬國寶通)投資管理(亞洲)董事及退休金業務主管
2000年  擔任盈科天馬動力營運總裁
2001至2007年  擔任旅遊發展局市場推廣總經理
2007至2008年  擔任星展香港信用卡及私人貸款業務董事總經理
2010年  出任謝瑞麟首席營運總監

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載