› 選擇地區
三藩市
紐約
洛杉磯
其他美國地區
香港 台灣 北美
 
2012年12月17日

中門大開:啟德翻版 - 添馬男

有傳政府有意將原本籌備興建私立大學的粉嶺皇后山地皮,更改用途作起樓。

上周政府高層同傳媒飯局,吹風話粉嶺皇后山地皮,原本用來發展私立大學,又會推倒重來用作起樓云云,見報之後政府內外媽聲四起,整件事尤如啟德體育城鬧劇翻版。

原本整個招標計劃已接近完成,教育局官員同申請開辦私立大學之耶穌會人士亦有接觸,就辦學及收生方面商討。據悉今次推倒重來構想,完全冇同教育局官員商討,是梁振英及陳茂波兩人傾掂話改就改,並且趁林鄭回英度假,乘機吹出去。為何兩人如此鬼祟?皆因今次申辦大學之耶穌會,大有來頭,而且亦籌備經年。在本地由一班華仁舊生及神父牽頭,背後有美國聖母大學、日本上智大學幫手,而天主教耶穌會在世界各地辦學,有龐大學術資源網絡作後台。
有關團體先後同政商猛人接觸,並得到佢哋祝福,而林鄭也表態支持,仲有李國章、林煥光、羅范也認同。上次梁粉忽然將體育城推倒,引來德成局長大怒、聯同體育界高調反擊,表示不惜號召體育界人士上街反對,一拍兩散,呢班梁粉一計不成又生一計,諗住搵天主教嚟恰,冇親中自己友支持,勢孤力弱。可惜黑波局長又計錯數、華仁舊生勢力遍佈政學商界別,個個猛人,而且游說經年,不少猛人經已落咗叠,家先至縮沙,就變咗冇信用,所以要為黑波站台,絕無可能。

梁粉為面子 打皇后山主意

梁振英及其黨羽,果真教而不善,冇learning curve可言,冇規冇矩,亂搞一通,為達自己政治目的,不擇手段,挑動自己政府內部矛盾。佢自己選舉時口輕輕托大,認為香港大把地,只係公務員積非成是,官僚主義,當時我早已講過振英亂噏,無視土地開發及規劃程序,欺騙市民,好嘞,家知道真係冇捷徑,為咗面子,死唔認錯,唔承認當日亂噏托大,反而打其他計劃主義。公務員眼中,政府乃一個延續,並非人去政息,因此對兩人試圖推倒私立大學計劃,極之反感。
梁振英折騰港人,究竟何時先會停止呢?

添馬男

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載