› 選擇地區
三藩市
紐約
洛杉磯
其他美國地區
香港 台灣 北美
 
2013年01月14日

中環在線:為保飯碗博同情
分析員肉麻拉票 - 李華華

「在2013年我們將會繼續做到最好,
晴天陰天雨天都守候在您旁邊!」

以上呢句嘢唔係出自CY首份施政報告,而係一間外資證券行嘅地產分析員用嚟拉票嘅電郵內容。財經刊物《Institutional Investor》今個月搞最佳分析員投票,各行分析員出盡法寶,提醒班基金經理投佢哋一票。
《II》每年年頭都搞最佳分析員投票,喺每個國家、行業搵出最佳分析員,舊年喺亞洲區美銀美林最多分析員攞第一,銀行、消費、基建、保險等都係佢哋嘅分析員排第一。

唔睇往績睇service

雖然排第一未必即刻升職加薪,但起碼可以加分,近年投行裁員之聲此起彼落,排名高啲點都可以易啲保住份工。好多buy-side朋友最近收到分析員嘅拉票電郵,主要講番舊年叫過人買乜股,搞過幾多場管理層午餐會呀咁,同議員拉票情況差不多,差在未拉banner話「成功推介乜乜股」!
文首引述嗰間證券行嘅分析員咪落足感情去拉票囉,除咗話常伴左右,仲有「人間有情,請您伸出同情之手幫助我們」,唔知以為係籌款!唔止呢間,一間美資行嘅分析員亦寫得好白,佢話:
「每一票有助我哋喺投行裁員風暴中,遮風擋雨。」
由此可見,呢個排名榜對佢哋保住份工有幾重要。聽buy-side朋友講,佢哋未必投票畀扑中最多股票嘅分析員,事關成年咁長,佢哋叫買嘅股票總有升嘅時候,唔作得準;佢哋反而欣賞嗰啲平日要搵資料時,即刻幫到手嘅分析員。咁又係,容易搵、講嘢靠譜嘅股評人都寧舍受傳媒歡迎啦。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載