› 選擇地區
三藩市
紐約
洛杉磯
其他美國地區
香港 台灣 北美
 
2013年01月14日

職場慧眼:大開眼界 - 張慧敏

中環舊Ritz Carlton,是我和一眾好友昔日的聚腳地,亦是見客戶飲一杯食個飯常去的地方。新店開張經已一段日子,我一次都未幫襯過,因為老友們拿它和舊店比,各方面水準都今非昔比,除了價錢。我不想破壞美好回憶,加上除非揸車,否則非常不就腳,我還是在四季打躉算罷了!
誰知大學老友H難得約到PB大姐大「A姐」食飯,地點選在PB大姐A的辦公室樓上Ritz Carlton的Tosca,邀請我一起聯誼,有得見朋友有得見識又有得食,卻之不恭,當然第一時間嗒糖應承。果然好嘅唔靈醜嘅靈!
我由九龍站行去酒店,好不容易折騰一番終於到達。我行得急,坐低即點一支大樽裝有氣礦泉水消熱,然而天氣清涼,何解加斟的水越來越暖咁奇怪?原來侍應小姐任由瓶蓋打開,放在窗台任由太陽猛烈照射。一杯暖的走氣礦泉水可以有幾難飲?毋須多講,大家試試就知。用一個最細size的豉油碟來放點麵包的油醋,只得幾滴夠點幾塊?要問先識去攞兩支出來stand by加添,究竟應該加邊樣加幾多,應否問問客人喜好先呢?
明明氣溫15℃,莫非心火盛越食越熱?原來冷氣不能開大,否則風口就會有倒汗水,樓底高成咁點抹?滴下來落在食物或者食客頭上更大鑊,所以冇辦法,大家只好齊齊除衫,慘在A姐除不了她的樽領羊毛衫!柯打甜品時侍應姐姐話包咖啡或茶,我以為去錯茶餐廳,忍不住出聲,今餐要是我請客,乜架都丟清!這裏三道菜午餐收費貴過半島Gaddi's,人家還包餐酒一杯。意大利餐廳食完飯冇咖啡飲至出奇,關包唔包乜事?那個包字實在cheap到無倫!都知今非昔比,只是水準低落如此,實在難以想像,這種眼界,開一次都嫌多!

張慧敏
http://www.facebook.com/HKcareerdoctor

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載