› 選擇地區
三藩市
紐約
洛杉磯
其他美國地區
香港 台灣 北美
 
2013年01月19日

焦點故事:
阿麥:我好後悔買夾屋!

阿麥憶述早年買入夾屋的辛酸史。

「30歲的決定,影響下半生。」16年前,阿麥一家三口租私樓,覺得幫人供樓不是味兒,碰巧房協推出夾屋,針對不符合居屋資格的夾心階層,於是博一博,結果中籤,卻沒料到是噩夢的開始,安樂窩市值跌到不再安樂。儘管樓價如今已返家鄉,但過往的樓奴生活,一世難忘。
「97年前,樓價高,又買唔到居屋,惟有申請夾屋。」當年夾屋有三個樓盤,包括沙田晴碧花園、葵芳芊紅居及將軍澳叠翠軒,「有政府資助,我諗應該可以保障業主安居樂業。」雖然中籤,可惜抽不到好籌,「心儀嘅晴碧花園已經被人揀晒,剩番芊紅居,其實有個安樂窩已經唔錯,唔使擔心加租,又唔使擔心兩年搬一次屋,覺得生活終於可以穩定落嚟!」

相關新聞:焦點故事:夾屋零星放盤葵涌浩景臺 三房望海 八成實用

適逢97 變相做負資產

最後選擇567方呎兩房單位,定價190萬元,一邊辦手續、付定金,一邊與銀行傾按揭,「恒生同我計,借八成,分20年還,條數計得掂喎!」終於有個安樂窩,還開心到跟相識不久的準業主,凌晨時分冒險進入芊紅居地盤,打開電筒照看未來新居的建築用料,因為同期將軍澳叠翠軒出現外牆剝落及空心磚等結構問題。
97年下半年,樓價下挫,未入伙的單位市值應聲下跌,銀行草擬的八成按揭計劃也石沉大海,「最多借六成……原本個計劃,冇咗……」當時很多人也不過是預備一、兩成首期上車,首期不足,上不到會,社會醞釀撻定潮。
不甘心,又擔心,「多年來嘅積蓄付諸流水,仲擔心追差價,房協係有權㗎,追起上來,真係要破產!」試過向房協提出回購,「原來夾屋唔同居屋,冇第二市場,又冇得回購。」

按揭觸礁 被迫二按上會

左右做人難,碰巧有個關於夾屋準業主上會困難的講座,會上都是同路人,最後組成「夾屋準業主權益關注組」,即是「夾屋大聯盟」的前身。
「當時我哋上街遊行,社會上覺得我哋輸打贏要,但我哋唔使還錢嗎?夾屋係政府資助房屋,我哋先有信心上車,點解最後爛撻撻?而房協賣咗單位後,就乜都唔理,準業主上唔上到會都好似唔關佢事。」
後來關注組和房協多番談判,最終房協願意承擔「二按」,並提供五年免息免供。有了二按,上會吧?「當時行前一步係辛苦,退後一步都係辛苦,這個決定很困難。上會?就變負資產。撻定?就冇晒積蓄、怕被追差價。」最後上會,「畢竟都係細單位,『lump sum』細,如果係大單位,一定唔會上會。」
供樓之初,仍死心不息,「我諗幾十萬樓價,幾年後會追上嚟,但樓價一直下跌,當時我以為樓價跌兩成就會停,點知跌至三成,最後……唉!跌到好多業主都唔信……」
03年還來個沙士,「屋苑有個低層單位,03年以120萬元賣出,呎價2100元, 仲要係補咗地價嘅價錢。」
當時經濟不景,裁員聲不絕,夾屋業主開始面對二按還款,阿麥話,一按加二按,佔去全家一半收入,節衣縮食都未夠,還要擔心飯碗不保。當時又發現不但賣樓有限制,就連加按也要先補地價,閒閒地補地價三成,發覺補完後,貴過私樓,怎會有買家接貨?他苦笑:「我哋叫呢個做『供死會』。」
今日樓價返家鄉,喜悅是有,但痛苦長埋,「我真係好後悔買夾屋!」到今日他仍然覺得夾屋計劃是怪胎,準備不足,支援不夠,今日的置安心和昔日的夾屋,同樣不設回購、有五年轉售限制、銀行不保證有九成按揭,他又再慨嘆:「當年供樓利息近10厘,今日利息兩厘多,如果加息、香港經濟受衝擊,供款、首期會完全變咗兩個世界。我冇本事叫人買唔買樓,但想叮囑有意透過政府資助計劃置業嘅人,量力而為,一切要作最壞打算。」

相關新聞:焦點故事:夾屋是怪胎 置安心=?

後記:小記受感動

聽着阿麥的故事,當年仔細老婆嫩,逼於無奈要上車,正好是小記當下狀況,不禁代入角色,一邊聆聽,一邊想像:「假如我係佢……」正當他講到以為終於有個竇,卻眼巴巴看着層樓由190萬元跌了一半,兩個大男人,一個哽咽,一個眼濕濕,好彩攝影大哥在別處追新聞,未及趕到,沒拍下這感人場面。本着開誠布公,望上司開恩,原諒小記丟架。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載