› 選擇地區
三藩市
紐約
洛杉磯
其他美國地區
香港 台灣 北美
 
2013年01月26日

樓市專題:
單身族 抽爆資助房屋

兩大資助項目反應熱烈,單身人士更大幅超額。

房協綠悠雅苑與「白表免補地價買居屋」兩大資助房屋項目去周截止,單身申請者異常熱烈,但單身想中籤,就要勁過葉問,一個打低幾百個。
記者:葉淑貞

有年輕入飛者揚言:「有樓冇樓,絕對影響我嘅美好人生!」旁觀者當然可以話:「人生唔係為層樓!」但在功利的香港,冇樓往往代表冇錢冇女,唔恐慌就假。
兩大資助房屋項目去周截止,截至周一數字,綠悠雅苑共收5.36萬票,白表居屋則收逾5萬申請。其中,綠悠接獲3.58萬份單身申請,但項目只有99個名額供這個族群認購,超額360倍,遠高於以家庭申請的19倍。

至於白表居屋計劃,有逾5萬宗,超額約9倍,但單身申請者眾,故單身超額會達到約40倍水平。
過往,買樓是家庭大事,但個人主義抬頭,嚮往自由空間,令原本沒有置業逼切性、上有高堂的屋邨仔,都急於以單人家庭身份買磚頭,「供樓當儲錢」的理財觀,已經根深蒂固了。

CASE 1【屋邨仔阿廣】
月入萬幾 冇樓冇女冇人生

做了幾年議員助理、月入萬餘元的阿廣(化名),自07年先後五次申購資助房屋,新近的置安心及白表免補價居屋,他也有大包圍,「頭頭尾尾『呃』咗我成千銀(申請費)!」
阿廣與父母及姊姊,住在葵涌區420方呎公屋,06年開始以單身資格申請公屋,一直冇聲氣,「唔知好彩定唔好彩,有天收到房署電話,問我有冇興趣買(荔枝角)荔欣苑,哇,700幾呎三房賣百幾萬,好開心呀,點知我上網一查,原來係間凶宅,有兩個人先後在該單位內跳樓(患自閉症的弟弟與姊姊口角後激動跳樓,其姊情緒受困,半年後步弟弟後塵)。」

樓價超預算 頂硬上照買

雖然未有談婚論嫁的對象,但他認為單身想買樓好正常,「是為了美好的將來!冇樓,絕對影響人生大事,冇女仔鍾意。結婚後住邊?若逼埋一齊,屋企人隨時有磨擦,但搬出去又捱唔住貴租。」
阿廣的上車預算才百多萬元,以其入息計,他預計可動用8000餘元供樓,「其實綠悠雅苑入場費要250萬元,已經超出預算,但若果幸運抽到,都會焗買。」若買二手居屋,則首選葵涌區葵俊苑及葵康苑,「呢兩個盤質素都係麻麻地,不過勝在近地鐵,而且比較平。」但翻查成交紀錄,兩個屋苑成交不多,未補地價的單位呎價已逾4000,入場費200多萬,對單身者而言都不易負擔。
「其實你睇番白表訂下的入息限制(單身入息限制25000元),𠵱家樓價咁貴,根本係好難供,就算抽到綠悠都唔係好so。」講到房策,阿廣一肚氣,「政策根本係排除單身者都有買樓需要,喂,單身唔係人呀?冇個竇,如何組織家庭?就算排隊上公屋,都應該畀個確實上樓日期,等大家有預算。」
綠表申請人寥寥無幾,只要肯交回公屋,基本上必然有份,但阿廣說:「用咗綠表,其他屋企人點呢?最好將來可以分戶啦。」

CASE 2【傳媒人梁先生】
分票入飛仲蝕咗

任職傳媒的梁先生,則與女友分開兩票申請單身名額,「以為分兩票可以多個機會,但估唔到單身申請咁熱烈,結果不但冇著數,中籤機會仲細咗!」
沒有抽白表居屋,只抽綠悠雅苑的梁先生是第二次抽資助房屋,他專攻全新樓,之前只抽過將軍澳居屋,「用緊9000幾元租沙田樓,都幾吃力。若今次抽不到,我會繼續抽下期置安心,喺沙田嘛,啱我心水。」但面對洶湧的單身置業潮,看來梁先生或應與女友拉埋天窗,才能提高中籤機會了。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載