› 選擇地區
三藩市
紐約
洛杉磯
其他美國地區
香港 台灣 北美
 
2013年01月28日

中環在線:
想上ifc頂樓 搵攞命陳快啲 - 李華華

Dream Bear大爆CY黑幕,搞到話要由國金二期頂樓跳樓,直情好似玩show hand晒冷咁。之不過,國金二期係恒地(012)同金管局總部,守衞森嚴,普通人莫講話上頂樓,就連行去𨋢口都唔可以自出自入,金管局總裁陳德霖坐喺88樓頂層,夢熊如果真係想上去,或者可以搵佢幫手,佢有名你叫做攞命陳。

守衞森嚴 好難四圍走

夢熊一話要跳國金二期,中環人即刻起哄,討論佢有冇機會上到頂層?上到去又有冇辦法打爆玻璃窗呢?又或者好似蝙蝠俠拍戲咁,咪上到去頂樓天台囉,有人又提議佢租用抹窗用嘅吊船,可能仲方便啲。
查實國金二期寫字樓守衞森嚴,按層數分好多組𨋢,租戶只可以入閘同坐𨋢去租用嘅樓層,即使係業主恒地,佢哋嘅員工只能喺72至76樓自由走動,要去其他樓層都要喺大堂登記先得。

夢熊主場 其實在皇九

就算夢熊喺國金二期租咗個寫字樓,佢都唔輕易上到頂樓,而根據佢份聲明,佢寫字樓喺皇后大道中九號。夢熊當然可以跑樓梯跑上頂樓,不過就會觸動到大廈保安警鐘,佢好快會俾保安截住問乜事囉。
普通市民要上國金二期寫字樓,一定要先登記,基本上仲要確認有預約先放行,以免白撞,家陣夢熊咁高調話要跳國金,斷估國金大堂reception班靚女一定會打醒十二分精神,見到夢熊一定問清楚佢搵邊位先,最頂77至88樓仲係金管局總部,你估咁易上到去咩?

李華華
mailto:LiWaWa@AppleDaily.com

新game出爐 ~ 快啲試下自己有無辦法上車啦!
【「樓」年運程小測試】
http://www.tomonews.net/game/hkhousingpolicy/

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載