› 選擇地區
三藩市
紐約
洛杉磯
其他美國地區
香港 台灣 北美
 
2013年01月28日

中門大開:天下大亂 - 添馬男

查史美倫等梁粉搞嘅金發局,一登場就要降格為諮詢組織。

自梁振英發表史上最低民意支持的「搵丁行騙」施政報告後,成個政府管治進入混亂狀態,首先被官場戲稱為blonde council嘅金發局,一登場真係變咗dumb blonde,連係男係女,定不男不女都未搞清就出街。查史美倫、李律仁一班梁粉搞咗半年,一路想擺脫官僚掣肘,有獨立地位及行政系統,咁樣班紅色大肥貓做委員先有面子,但班人同振英水平相近,志大才疏,冇同班官僚傾妥先,結果俾傳媒質疑其非官方地位,不受監察。

官僚見群情洶湧,立即做嘢,先將金發局downgrade為諮詢組織,仲要喺財經事務局下邊,當初以為係超級獨立金融政策局而加入嘅紅色肥貓,上錯了舢舨賊船,相信好快會淡出,唔會花時間陪CY癲。
半年下來已證明梁粉係一班冇操作能力嘅烏合之眾,中策組閉門幫振英搞首份施政報告,左度右度,一發出去畀政務司及常秘comment,立即大反彈,將梁粉們嘔心瀝血大作大段大段刪改,再由政務司統籌改寫,結果變成一份毫無性格、誰也不討好嘅報告。
報告出台後,外邊明眼人睇通晒政府五年內對土地供應束手無策,地產股即上,業主反價封盤,巿民恐慌搶樓。梁粉們左度右度,竟然冇經大腦,將早已打沉行唔通之空置稅,輪流由茂波、張良及CY吹出去,結果一出又俾傳媒嘲笑白癡,因囤積空置根本難界定,反而財政司鬍鬚曾一直唔出聲,任由班友出醜,政治智慧比林鄭高幾皮。

狼英政策恐走向極端

特區施政在一班業餘政客亂舞下,敗象畢呈,最慘係出事非關泛民或傳媒搗亂,而屬內部問題,包括處事不周,思路混亂,梁粉小圈子自我孤立,敵視政務官系統。在施政報告四處起火之際,dream bear充當哈馬斯人肉炸彈,引爆選舉內幕醜聞,想同CY攬住死,整個特區政局亂上加亂。
在此情況下,CY為保命,正常人會走回中間路線,拉住中產及民主派,但梁營乃一班有被害情意結嘅非主流政客,政策只有更進一步走向極端,包括23條立法、樓市對策,將亂局變得更亂,大家今年要小心。

添馬男

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載