› 選擇地區
三藩市
紐約
洛杉磯
其他美國地區
香港 台灣 北美
 
2013年01月28日

智取大市:東江環保食正污染概念 - 晉佳

上星期五恒指跌少少,二三線股就顯著調整,敏華(1999)、舜宇光學(2382)有大行唱好而爆上,其餘股價衰多過好;之前急升嘅奶粉股雅士利(1230)同合生元(1112),分別跌12.6%同4.3%,大升完就大跌,都幾凶險。升跌股份1比4,好友形勢太弱,晉佳暫時棄權唔玩,一係等恐慌性買入,一係等個股凶險市況過咗,先再諗加注。
長線嘅話都係等低撈,備忘股當中,可以睇睇做實事嘅環保股。內地74個重點城市今年開始公佈空氣污染指標PM2.5(懸浮粒子直徑小或等於2.5微米)數值,北京1月10日就公佈達到六級嚴重污染水平,雖然係人都知內地空氣質素麻麻,但聽到一樣譁然,即時搶購口罩同空氣淨化器。高官都咪話唔驚,實行加大力度搞環保。
國家環保部部長周生賢上周話,將出台多項措施重點治理PM2.5,確保2015年重點區域PM2.5年均濃度下降5%,京津冀、珠三角、長三角年均濃度下降6%。

中線目標45元

東江環保(895)主要從事工業廢物處理、加工,其中含鋼廢物經處理可變成貴金屬,處理含銅廢物還可生產硫酸銅、硫酸鎳、氧化銅等。如果將工業廢物當普通垃圾處理,會對空氣、土壤同水構成嚴重污染,所以東江環保業務對於改善空氣質素都有間接幫助,值得鼓勵。
事實上,東江環保過去幾年業績都好見得人,之前公司發過盈喜,預料舊年全年淨利潤增長30%至45%,介乎2.64億至2.94億元人民幣。以舊年最低嘅盈利預測推算,全年每股盈利就有2.36港元,市盈率只係15.8倍。
以一隻正常市況之下,盈利有本事年升三成,又有國策扶助嘅股份,歷史市盈率15.8倍實在唔係貴,呢個估值仲要係用盈利預測下限計算,屬於超級保守。有估值支持,睇嚟股價易升難跌,可以分段逢低吸納,以19倍市盈率定價,中線睇45元。如果股價冇大跌,不妨keep住半年。

晉佳
本欄逢周一、三及五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載