收獎金係開心事，為乜有人搞到咁好火呢？貴價茶餐廳翠華（1314）總經理李楸夏（Jessica）1月初話，準備過年前後向全體1,500名員工派700萬元獎金，每人大約分到2,000至10,000蚊，正當人人等袋至少2,000蚊，喺翠華做三廚嘅阿強就向本報投訴，話收得1,000蚊，仲要分兩期，鬧爆「咁不如唔好出」！
總經理：一場誤會
Jessica回應話係一場誤會，指公司今年派700萬獎金，係由舊年聖誕到本月底，分三個月以各項獎賞形式派發，加埋2,000至10,000蚊不等，唔係一次過派！佢話，舊年初亦係咁派獎金，共派400萬。
查實有員工咁嬲都正常嘅，睇住翠華股價不停升，噚日創新高，收報4.26元，較招股價升近九成，大老闆李遠康手貨市值16億，公司派獎金應該爽手啲啦。
