蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年02月27日
馬上成為壹會員

中門大開:有錢而低俗的惡棍 - 添馬男

內地影評人賈選凝發表了對彭浩翔《低俗喜劇》的影評,獲香港藝展局頒發首屆藝評獎金獎,獲5萬大元。賈小姐狠批《低俗喜劇》,認為係文化垃圾,將大陸人污名化,係一種阿Q式精神勝利法。賈小姐言論,觸動了中港矛盾神經,網民反應激烈。呢篇影評有問題,而負責評審如邱立本、林沛理、潘麗瓊頒個獎畀佢,更加有問題。睇開林沛理、邱立本等人評論,都知佢哋對文化藝術概念保守兼狹隘,認為文化要高尚,改進社會風氣,眼中只有高檔藝術,佢哋係借呢位北京小姐發洩,用佢影評對彭浩翔的批判來抒發自己感受。

《低俗喜劇》主角杜汶澤的回應夠抵死:「首先恭喜賈小姐得獎,亦感謝閣下買票觀看《低俗喜劇》。無暇拜讀妳的藝評,深感抱歉。祝福妳有天能放開懷抱,活得快樂!所謂『咩人睇到咩嘢』,蒙羅麗莎的微笑,快樂的人可能看到她對着你微笑,自卑的人卻覺得她在恥笑你。至於蒙羅麗莎她本人……佢理九得你!」
呢位賈小姐的文章乃瞎子摸象式評論,根本唔明白此片受歡迎真正原因。低俗喜劇唔係靠粗口嘩眾取寵咁簡單,香港觀眾亦非對粗口有一種禁忌的快感。如果你係八、九十後,你會對鄭中基呢位廣西黑幫大佬之無知及橫蠻產生共鳴,佢代表咗大家對共產黨嘅感覺,賈小姐所言之抹黑污名化,竟然大有市場,正因為反映本土民情。

鄭中基角色隱喻共產黨

𠵱家已經係2012年,鄭中基仲要求拍一套八十年代邵音音主演的《官人我要》,強行將時鐘撥回30年前,淨係呢個政治隱喻,本土香港人已拍爛手掌。政治上,北京最眷戀係八十年代行政主導體制,三權合作,冇政黨議會民主,冇新聞自由,一切聽聽話話,基本法試圖將香港凍結在那年代。當日英人阻礙民主化,以功能組別作權宜之計,北京接收了反而供奉上神枱,以求千秋萬世,將怪胎延續下去。北京自八九後對香港主流民意粗暴橫蠻,民主派至今連回鄉證仍未有,同片中鄭中基無知惡霸有乜分別?今日強國人以為有錢大晒,香港民情集體大反彈,十分正常。
一個有錢而bad taste嘅惡棍,全世界都係笑面奉迎賺人仔,一擰轉面就XYZ。仲好意思問人點解用粗口唱衰你,將你污名化,講出嚟大家沒趣。講到低俗、庸俗、惡俗,彭浩翔拍馬追唔上共產黨文化,亦比唔上飲共產黨文化奶水大嘅知識分子。

添馬男

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載